ក្រុមហ៊ុនមួយនៅប្រទេសជប៉ុនឈ្មោះ Neo Corpration កំពុងរងការរិះគន់ និង ខឹងសម្បាយ៉ាងខ្លាំងពីសំណាក់មហាជនជាច្រើន ក្រោយលេចឮថាក្រុមហ៊ុននេះបានពិន័យបុគ្គលិកដែលបំពេញការងារមិនបានល្អមិនគ្រប់គោលដៅ ក្នុងបែបបទបំពានផ្លូវភេទ។
ក្រុមហ៊ុនខាងលើនេះដែរមានទីតាំងស្ថិតនៅទីក្រុង Osaka ដែលជាក្រុមហ៊ុនផលិត និង លក់គ្រឿងម៉ាស៊ីនអេឡិចត្រូនិច។ បច្ចុប្បន្ន ក្រុមហ៊ុនកំពុងប្រឈមនឹងការត្រួតពិនិត្យស៊ើបអង្កេតខ្លាំង ក្រោយមានបុគ្គលិកចំនួន ៥ នាក់ដាក់ពាក្យបណ្ដឹងពាក់ព័ន្ធការបំពានរាងកាយ ការកាត់ប្រាក់ខែមិនត្រឹមត្រូវ និង ការប្រើប្រាស់អំណាចមកបៀតបៀនកូនចៅ។ ពួកគេបានទាមទារសំណងជំងឺចិត្តចំនួន ១៩ លានយេន (ប្រមាណ ១២៩ ៩៦២ ដុល្លារ)។
តាមការបញ្ជាក់ពីខាងបុគ្គលិក ក្រុមហ៊ុនដែលល្បីជុំវិញរឿងផ្ដល់ថ្លៃកុំមីស្យុងលក់ដ៏ល្អសម្រាប់បុគ្គលិក បែរជាពិន័យបុគ្គលិកដែលលក់មិនគ្រប់គោលដៅជាមួយនឹងទង្វើដ៏ថោកទាប និង ឈឺចាប់ទៅវិញ។ តាមពាក្យ បណ្ដឹង ការពិន័យទាំងនោះរួមមានទាំងការបង្ខំបុគ្គលិកឱ្យថតរូបស្រាត និង ការបំពានចាប់ប្រដាប់ភេទលើបុគ្គលិកប្រុសៗ។
ពេលលោករាយការណ៍ពីការបៀតបៀននេះទៅខាងអ្នកគ្រប់គ្រងសាខា លោកបែរជាត្រូវគេសើចហើយប្រាប់មកវិញថា៖ «គ្រប់គ្នាឆ្លងកាត់រឿងហ្នឹងអស់ហើយ»។ ការមិនខ្វាយខ្វល់ពីថ្នាក់លើក្រុមហ៊ុននេះហើយបានធ្វើឱ្យបុគ្គលិកមានសម្ពាធរហូតកើតជំងឺផ្លូវចិត្ត។
មិនទាន់ចប់ត្រឹមហ្នឹងទេ ក្រុមហ៊ុនដដែលនេះក៏រងការចោទពីបុគ្គលិកជុំវិញការបំពានដោយពាក្យសម្ដី និង បង្ខំបុគ្គលិកឱ្យធ្វើការលើសម៉ោងការងារទៀតផង។ ដោយឡែក ក្នុងពាក្យបណ្ដឹងមួយករណីទៀត បានលើកឡើងថាអ្នកគ្រប់គ្រងសាខាត្រូវខាង director ក្រុមហ៊ុនទះកំផ្លៀងព្រោះតែមិនបានមកចូលរួមការជួបជុំរបស់ក្រុមហ៊ុន។
បន្ថែមពីនេះ បុគ្គលិកក៏បានអះអាងទៀតថា ក្រុមហ៊ុនបានដកថ្លៃកម្រៃជើងសារលក់ ហើយជួនកាលក៏បានទាមទារឱ្យបុគ្គលិកផ្ទេលុយឱ្យវិញក្រោយទទួលបានប្រាក់ខែ។
យ៉ាងណាមិញ តាមរបាយការណ៍ព័ត៌មានពី SCMP ខាងក្រុមហ៊ុន Neo Corpration បានចេញមកបដិសេធរាល់ការចោទប្រកាន់ខាងលើនេះ៕
ប្រភព៖ SCMP
