ប្រុងប្រយ័ត្នទាំងអស់គ្នា! ខ្យល់ពុល PM 2.5 មិនត្រឹមតែប៉ះពាល់ដល់ផ្លូវដង្ហើមទេ តែអាចទាញសារធាតុគីមីផ្សេងៗបញ្រ្ចៀបចូលទៅក្នុងស្បែកទៀត

ថ្មីៗនេះ ខ្យល់ពុល PM 2.5 បានកំពុងក្លាយបញ្ហាដែលគួរឱ្យបារម្ភណាស់សម្រាប់ប្រទេសមួយចំនួននៅលើពិភពលោក ព្រោះតែខ្យល់អាចបង្កជាការប៉ះពាល់ដល់សុខភាពរបស់មនុស្ស ជាពិសេសគឺប៉ះពាល់ដល់ប្រព័ន្ធផ្លូវដង្ហើម ​និងប្រព័ន្ធសរសៃឈាមបេះដូង លើសពីនេះទៀតវាក៏អាចប៉ះពាល់សុខភាពស្បែកទៀតផង។

ក្នុងនោះ លោកវេជ្ជបណ្ឌិត Thanin Vejchapinan អគ្គនាយករងនៃនាយកដ្ឋានសេវាវេជ្ជសាស្រ្ដរបស់ថៃបានឱ្យដឹងថា ស្បែកគឺជាសរីរាង្គដ៏សំខាន់ដែលប៉ះពាល់នឹងបរិស្ថាន ក៏ដូចសារធាតុបំពុលផ្សេងៗក្នុងបរិយាកាសគ្រប់ពេលវេលា ដូច្នេះហើយទើបវាងាយនឹងរងការប៉ះពាល់ពីខ្យល់ PM 2.5 ។ តាមព័ត៌មានដែលបានមកពីការស្រាវជ្រាវបានឱ្យដឹងថា ភាគល្អិតធូលីតូចៗរបស់ PM ២.៥  អាចចូលទៅក្នុងស្បែកដោយផ្ទាល់តាមរន្ធរោម ឬអាចចូលទៅក្នុងស្បែកដែលស្ថិតក្នុងស្ថានភាពមិនប្រក្រតី (barrier-disrupted skin) ដូចជាស្បែកដែលមានជំងឺអាឡែកស៊ីជាដើម។

ខ្យល់ PM 2.5 នេះអាចភ្ជាប់ខ្លួនជាមួយសារធាតុគីមី និងលោហធាតុផ្សេងៗនៅក្នុងបរិយាកាស ហើយនាំវាចូលទៅក្នុងស្បែកបាន វាអាចបំផ្លាញកោសិកាស្បែក និងធ្វើឱ្យកោសិកាស្បែកមានដំណើការការពារ និងជួសជុលខុសប្រក្រតី ព្រមទាំងរំញោចកោសិកាស្បែករលាកបានទៀត។ PM 2.5 អាចធ្វើឱ្យស្បែកឆាប់នឹងមានភាពជ្រីវជ្រួញ និង អាចធ្វើឱ្យមានការលាក ឬ រមាស់ ហើយសម្រាប់អ្នកដែលមានសុខភាពស្បែកខ្សោយ ឬមានជំងឺស្បែកស្រាប់ វាអាចនឹងធ្វើឱ្យលាប់ឡើងវិញ៕

ប្រភព៖ AMARINTV