DJ Koo ស្វាមីអតីតតារាសម្ដែងស្រីតៃវ៉ាន់ Barbie Hsu នៅតែនិយាយដដែលៗថា រូបលោកគឺនៅតែពិបាកខ្លាំងក្រោយប្រពន្ធលាចាកលោកទៅ ប៉ុន្តែនឹងព្យាយាមឱ្យខ្លួនឯងរឹងប៉ឹងឡើងវិញ។
តាមសារព័ត៌មាន Next Apple កាលពីយប់ថ្ងៃទី ០៦ ខែឧសភា ឆ្នាំ ២០២៥ កន្លងទៅ សាច់ញាតិ និង មិត្តភក្តិជាច្រើនរបស់ Barbie Hsu គឺមានការព្រួយបារម្ភចំពោះ DJ Koo ដោយពួកគេតែងតែផ្ញើសារតាមដានលោកជាប្រចាំ និង លើកទឹកចិត្តផ្ដល់ការជួយគ្រប់បែបយ៉ាងប្រសិនបើលោកត្រូវការ។ តាមប្រភពមួយបានទម្លាយថា ក្នុងការសន្ទនាថ្មីៗនេះ DJ Koo បានរៀបរាប់ថាលោកបច្ចុប្បន្ននៅតែគិតថាជីវិតគឺមិនងាយស្រួលឡើយ ប៉ុន្តែលោកតែងតែប្រាប់ខ្លួនឯងឱ្យរឹងមាំ និង រស់នៅឱ្យល្អ។
តាមការបញ្ជាក់ពីមិត្តភក្តិម្នាក់របស់ DJ Koo បាននិយាយថា លោកគឺគ្មានបំណងចាកចេញពីតៃវ៉ាន់ទៅរស់នៅស្រុកកំណើតឯកូរ៉េខាងត្បូងវិញឡើយ ព្រោះលោកចង់បន្តរស់នៅក្រោមមេឃតែមួយជាមួយប្រពន្ធ។ ជាញឹកញាប់ លោកតែងតែទៅសម្អាតផ្នូរប្រពន្ធ និង និយាយជជែកលេងជាមួយនាង។
គួររំឭកថា តារាសម្ដែងស្រីតៃវ៉ាន់ Barbie Hsu ដែលប្រិយមិត្តកម្ពុជាស្គាល់ថាជាតួអង្គនាង សាន់ឆាយ ប្រចាំរឿង «F4» នោះ បានទទួលមរណភាពកាលពីថ្ងៃទី ០២ ខែកុម្ភៈ ឆ្នាំ ២០២៥ កន្លងទៅនៅប្រទេសជប៉ុន ក្នុងវ័យ ៤៨ ឆ្នាំ ដោយសារជំងឺផ្ដាសាយ និង រលាកសួត៕
