ជម្លោះការទូតបានផ្ទុះឡើងក្នុងអង្គប្រជុំគណៈកម្មាធិការបេតិកភណ្ឌពិភពលោកកាលពីថ្ងៃទី ១០ ខែកក្កដា ឆ្នាំ ២០២៥ កន្លងទៅ នៅពេលរដ្ឋមន្ត្រីក្រសួងវប្បធម៌កម្ពុជាបានចោទប្រទេសថៃរឿងសាងសង់វត្ត Phu Manfa ចម្លងតាមប្លង់របស់ប្រាសាទអង្គរវត្ត។
ក្នុងអង្គប្រជុំនោះដែរ លោកជំទាវ ភឿង សកុណា រដ្ឋមន្ត្រីក្រសួងវប្បធម៌របស់ប្រទេសកម្ពុជាបានថ្លែងក្នុងសម័យប្រជុំគណៈកម្មាធិការបេតិកភណ្ឌពិភពលោកលើកទី ៤៧ ថា វត្តរបស់ប្រទេសថៃបានចម្លងតាមប្រាសាទអង្គរវត្ត ដែលធ្វើឱ្យខូចតម្លៃជាសកលនៃសម្បត្តិបេតិកភណ្ឌពិភពលោក។ លោកជំទាវបានស្នើឱ្យអង្គការ UNESCO ធ្វើការស៊ើបអង្កេតលើបញ្ហាចម្លងមួយនេះ។
ដោយឡែក ខាងប្រធានប្រតិភូរបស់ប្រទេសថៃ លោក Seehasak Phuangketkaew បានចេញមកបដិសេធលើការចោទប្រកាន់នេះ និង ថែមលើកឡើងថានេះជារឿងនយោបាយ មិនសមសួរនឹងលើកឡើងមកនិយាយក្នុងវេទិកាបេតិកភណ្ឌពិភពលោកនោះឡើយ។ ប្រធានប្រតិភូដដែលនេះបានបកស្រាយថា វត្ត Phu Manfa គឺជាស្ថាបត្យកម្មបែបពុទ្ធសាសនាដែលបំផុសគំនិតដោយទីតាំងប្រវត្តិសាស្ត្ររបស់ថៃជាច្រើន មិនមែនចម្លងតាមសំណង់ប្រាសាទដ៏ល្បីល្បាញនៅកម្ពុជាឡើយ។
លោកថែមទាំងសម្ដែងការភ្ញាក់ផ្អើល និង ខកចិត្តចំពោះការអះអាងរបស់ប្រទេសកម្ពុជាដោយលើកឡើងថា៖ «សម្បត្តិវប្បធម៌គួរនាំឱ្យមនុស្សរួបរួមគ្នា មិនមែនបំបែកបំបាក់គ្នាទេ»៕
