កាលពីយប់ថ្ងៃទី ៣១ ខែសីហា ឆ្នាំ ២០២៥ កន្លងទៅ ខេត្ត Kunar ភាគខាងកើតប្រទេសអាហ្វហ្គានីស្ថាន បានរងការវាយប្រហារដោយគ្រោះរញ្ជួយដីខ្លាំងក្លា បណ្ដាលឱ្យមនុស្សយ៉ាងហោចណាស់ ៥០០ នាក់បាត់បង់ជីវិត និង ១ ពាន់នាក់ផ្សេងទៀតបានរងរបួស។
តាមទីភ្នាក់ងារវាស់ស្ទង់ភូមិសាស្ត្រ USGS បានកត់ត្រាគ្រោះរញ្ជួយដីកម្រិត ៦ រ៉ិចទ័រ កើតមានឡើងនៅវេលាម៉ោង ១១ និង ៤៧ នាទីយប់ថ្ងៃទី ៣១ ខែសីហា ឆ្នាំ ២០២៥ (ពេលវេលាក្នុងតំបន់) ដោយចំណុចកណ្ដាលស្ថិតនៅ ២៧ គីឡូម៉ែត្រភាគឦសានក្រុង Jalalabad ខេត្ត Nangarhar ក្នុងជម្រៅ ៨ គីឡូម៉ែត្រ។ ប្រមាណ ២០ នាទីក្រោយមក គ្រោះរញ្ជួយដីកម្រិត ៤.៥ រ៉ិចទ័រ និង ៥.២ រ៉ិចទ័រវាយប្រហារទីតាំងនោះម្ដងទៀត ដោយគ្រោះរញ្ជួយដីទាំង ២ ក្រោយនេះស្ថិតក្នុងជម្រៅ ១០ គីឡូម៉ែត្រ។
តាមការចេញផ្សាយរបស់វិទ្យុ និង ទូរទស្សន៍ជាតិប្រចាំប្រទេសអាហ្វហ្គានីស្ថាន RTA មនុស្សប្រមាណ ៥០០ នាក់បានស្លាប់ និង ១ ពាន់នាក់បានរងរបួស ដោយតំបន់ដែលរងការប៉ះពាល់គឺស្ថិតនៅតំបន់ដាច់ស្រយាលគ្មានប្រព័ន្ធទំនាក់ទំនងល្អឡើយ។ សង្កាត់ Nur Gal, Sawki, Watpur, Manogi និង Chapa Dara នាខេត្ត Kunar រងការខូចខាតធ្ងន់ធ្ងរ។ បណ្ដាផ្លូវឆ្ពោះទៅ Dewa Gul ក្នុងសង្កាត់ Sawki និង Mazar Dara ក្នុងសង្កាត់ Nur Gul ត្រូវបានផ្ដាច់ជិតដោយសារតែការរអិលបាក់ដី ធ្វើឱ្យមានការលំបាកខ្លាំងដល់ក្រុមសង្គ្រោះ៕
