រៀបការបាន ១ ខែ តែពេលប្រពន្ធមានផ្ទៃពោះ ពិនិត្យឃើញអាយុគភ៌ ១ ខែកន្លះ។ ស្តាប់ដំបូងអាចគិតថាអាយុគភ៌ និង រយៈពេល ហាក់មិនស៊ីគ្នាទាល់តែសោះ តែតាមពិតទៅ គេមានរបៀបគណនា ដោយផ្អែកទៅលើវដ្តរដូវរបស់ស្ត្រី។
ជាក់ស្តែង តាមការបកស្រាយរបស់គណនី TikTok អ្នកគ្រូ គឹមសយ ឡេឌីហ៊ែល អ្នកគ្រូបានពន្យល់ឱ្យអស់ចម្ងល់យ៉ាងដូច្នេះថា ចំពោះអាយុគភ៌ ក្បួនទូទៅប្រើទូទាំងសកល គេប្រើរូបមន្តគណនាយកវដ្តរដូវស្ត្រីជាគោល មានន័យថា គេរាប់ថ្ងៃមានគភ៌ចាប់តាំងពីថ្ងៃទី ១ នៃការមករដូវរបស់ស្ត្រី។
អ្នកគ្រូបានលើកជាឧទាហរណ៍ថា ស្ត្រីមករដូវនៅថ្ងៃទី ១០ ខែ កក្កដា រួចរៀបការនៅថ្ងៃទី ២៥ ខែ កក្កដា។ លុះដល់ថ្ងៃទី ១០ ខែសីហា ស្ត្រីបានបាត់រដូវដោយសារមានគភ៌។ ពិតមែនទៅការរួមភេទនៅថ្ងៃរៀបការ ឬ ក្រោយថ្ងៃរៀបការខុសគ្នាតិចតួច គឺជាអំឡុងពេលនៃការខ្ជាក់មេជីវិតញី ដែលជាឱកាសធ្វើឱ្យស្ត្រីមានគភ៌។ ដូច្នេះទោះស្ត្រីបានរួមភេទតែម្តងនៅអំឡុងនោះ វាក៏អាចធ្វើឱ្យស្ត្រីមានគភ៌ផងដែរ។
ចុះសួរថា ម្តេចរៀបការទើបបាន ២ សប្តាហ៍ ហេតុអ្វីលទ្ធផលអាយុគភ៌ ៤ សប្តាហ៍? ដូចបានលើកឡើងនៅខាងដើម គេប្រើរូបមន្តគណនា ដោយយករដូវស្ត្រីជាគោល គឺគេរាប់ចាប់តាំងពីថ្ងៃទី ១ ពេលស្ត្រីមករដូវ គឺនៅថ្ងៃទី ១០ ខែ កក្កដា រហូតដល់ថ្ងៃពិនិត្យ មិនមែនរាប់ពីថ្ងៃរៀបការថ្ងៃទី ២៥ កក្កដា ដែលជាថ្ងៃខ្ជាក់មេជីវិតញីនោះទេ៕
ចុចទីនេះ ដើម្បីទស្សនាវីដេអូ ៖
