ពលរដ្ឋចំនួន ២៥០០០ នាក់នៅទីក្រុង Lice ខេត្ត Diyarbakir ប្រទេសតួកគី នាំគ្នាកើតអាការ High ដោយមិនដឹងខ្លួន ក្រោយប៉ូលិសធ្វើការដុតបំផ្លាញកញ្ឆាដែលរឹបអូសបានប្រមាណជាង ២០ តោន។
កាលពីថ្ងៃទី ១៨ ខែមេសា ឆ្នាំ ២០២៥ កន្លងទៅ អាជ្ញាធរប្រទេសតួកគីបានរៀបចំធ្វើការដុតកញ្ឆាដែលរឹបអូសបានជាង ២០ តោននៅក្នុងទីក្រុង Lice ដែលបង្កជាផ្សែងខ្មួលខ្មាញ់សាយភាយឡើងលើអាកាសទៅពាសពេញក្រុង។ ប្រតិបត្តិការដុតបំផ្លាញកញ្ឆានេះដែរ បានធ្វើឱ្យពលរដ្ឋមិនអាចបើកបង្អួចផ្ទះ ឬដើរហើរចេញទៅក្រៅរយៈពេលយ៉ាងហោចណាស់ ៥ ថ្ងៃ ក៏ព្រោះតែខ្លាចស្រូបក្លិនកញ្ឆាធ្វើឱ្យពួកគេកើតអាការ high រវើរវាយ វិលមុខ រកកលចង់ក្អួតជាដើម។ តាមការរៀបរាប់របស់ពលរដ្ឋម្នាក់បានឱ្យដឹងថា៖ «ក្លិនកញ្ឆាបានវិលវល់ក្នុងក្រុងរាប់ថ្ងៃ។ ពួកយើងមិនហ៊ានបើកបង្អួចឡើយ ហើយកូនៗរបស់ពួកយើងក៏ធ្លាក់ខ្លួនឈឺ ពិបាកដកដង្ហើមរហូតត្រូវបញ្ជូនទៅមន្ទីរពេទ្យទៀត»។
គួរឱ្យដឹងថា កញ្ឆាដែលត្រូវបានដុតបំផ្លាញទាំងនោះ មានទម្ងន់ ២០ តោន ៧៦៦ គីឡូ និង ៦៧៩ ក្រាម គិតជាសាច់ប្រាក់មានតម្លៃដល់ ២៦១.៤ លានដុល្លារ ត្រូវបានរឹបអូសពាសពេញទាំងខេត្ត Diyarbakir អំឡុងឆ្នាំ ២០២៣ និង ២០២៤។
លោក Yahya Oger ប្រធានសមាគម Green Star ដែលជាអង្គការចែកចាយការយល់ដឹងអំពីគ្រឿងញៀន បានរិះគន់ទៅលើចំណាត់ការរបស់ប៉ូលិសដែលធ្វើការដុតបំផ្លាញកញ្ឆានៅទីសាធារណៈបែបនេះ។ លោកបាននិយាយថា ការដុតបំផ្លាញរុក្ខជាតិញៀនទាំងនេះអាចបង្កជាការបំពុលធ្ងន់ធ្ងរ។ ត្រឹមបារីមួយដើមគឺប៉ះពាល់ដល់សុខភាពអ្នកជក់ ហើយផ្សែងដែលបង្ហុយពីអ្នកជក់នោះទៀតក៏បង្កការប៉ះពាល់ដល់មនុស្សជុំវិញខ្លួនដូចគ្នា។ លោកសង្កត់ធ្ងន់ទៀតថា ភាពជោគជ័យក្នុងការប្រឆាំងនឹងគ្រឿងញៀនរបស់រដ្ឋាភិបាលគឺពិតជាគួរឱ្យស្ញប់ស្ញែង ប៉ុន្តែចំពោះការដុតបំផ្លាញលក្ខណៈបែបនេះគឺខុសទាំងស្រុង។ ជាងនេះទៅទៀតនោះ មន្ត្រីទាំងនោះថែមទាំងរៀបកញ្ឆាចេញជារាងអក្សរ LICE ទៅទៀត ដែលនេះសបង្ហាញពីភាពគ្មានវិជ្ជាជីវៈ និង បង្កការប៉ះពាល់ខ្លាំងទៅដល់ប្រជាពលរដ្ឋ៕
ប្រភព៖ odditycentral
