បែកធ្លាយរូបភាព និង សារក្ដៅគគុកយ៉ាងណា តែភ្នាក់ងាររបស់ Kim Soo Hyun បានត្រឹមចេញមុខប្រកាន់ជំហរដដែលថា ជារឿងមិនពិត

នៅថ្ងៃទី ១២ ខែមីនា ឆ្នាំ ២០២៥ នេះ ទីភ្នាក់ងាររបស់តារាសម្ដែងប្រុស Kim Soo Hyun បានធ្វើការបដិសេធជាថ្មីទៅកាន់សារព័ត៌មាន Xportnews ដោយពួកគេនៅតែរក្សាជំហរដដែលពាក់ព័ន្ធនឹងរឿងរ៉ាវជុំវិញអតីតតារាស្រី Kim Sae Ron ដោយអ្វីដែលបានទម្លាយទាំងនោះគឺ «មិនពិតនោះទេ»។ ទីភ្នាក់ងារ Gold Medalist បានរៀបរាប់ថា៖ «ជំហររបស់យើងគឺនៅដូចនឹងជំហរដែលយើងបញ្ជាក់កាលពីថ្ងៃមុនអ៊ីចឹង»។

គួរឱ្យដឹងថា កាលពីថ្ងៃទី ១០ ខែមីនា ឆ្នាំ ២០២៥ កន្លងទៅ ក្រុមគ្រួសាររបស់ Kim Sae Ron បានចេញមកអះអាងតាមរយៈ Youtube channel «Garosero» ដោយបានទម្លាយថា Kim Sae Ron បានមានទំនាក់ទំនងស្នេហាជាមួយ Kim Soo Hyun រយៈពេល ៦ ឆ្នាំតាំងពីនាងមានអាយុទើប ១៥ ឆ្នាំ។

យ៉ាងណាមិញ ជាការឆ្លើយតប ខាង Gold Medalist បានបញ្ជាក់ថា ការអះអាងទាំងនោះគឺជារឿងមិនពិត និង ថែមទាំងបន្ថែមថាពួកគេនឹងចាត់វិធានការតាមផ្លូវច្បាប់ទៀតផង។ ដោយឡែកនៅថ្ងៃបន្ទាប់ ខាង Garosero ក៏បានធ្វើការឡាយវីដេអូទម្លាយសាររបស់ Kim Sae Ron ផ្ញើទៅកាន់ Kim Soo Hyun ហើយពួកគេក៏បានទម្លាយរូបភាពថើបគ្នាមួយសន្លឹកជាភស្តុតាងបន្ថែមទៀត ក្រោយខាងភ្នាក់ងារ Kim Soo Hyun ចេញមកបដិសេធការលើកឡើងរបស់ពួកគេនោះ៕

ប្រភព៖ Koreaboo