បើធ្លាប់គួរឈប់ភ្លាម! បុរសធ្វើការអូហ្វីសម្នាក់កើតរោគផ្សិតក្នុងសួត ក្រោយចូលចិត្តហិតស្រោមជើងខ្លួនឯង

សារព័ត៌មាន Sinar Harian បានចេញផ្សាយរឿងរ៉ាវរបស់បុរសវ័យកណ្ដាលជាបុគ្គលិកអូហ្វីសម្នាក់នៅក្នុងប្រទេសចិន ដោយថ្មីៗនេះត្រូវបានចូលព្យាបាលនៅមន្ទីរពេទ្យក្រោយកើតមានអាការឆ្លងរោគចូលក្នុងសួត។

តាមព័ត៌មានបានឱ្យដឹងថា បុរសខាងលើត្រូវទទួលការព្យាបាលនៅមន្ទីរពេទ្យក្រោយគ្រូពេទ្យរកឃើញថាលោកបានកើតមានរោគផ្សិតក្នុងសួត ដែលជឿជាក់ថាកើតចេញពីទម្លាប់ដែលលោកចូលចិត្តហិតស្រោមជើងកង្វក់ៗរបស់ខ្លួនឯងជាប្រចាំ។ ក្រុមគ្រូពេទ្យបានធ្វើ CT ស្កេន និង MRI ដោយលទ្ធផលពួកគេបានប្រទះឃើញអ្វីម្យ៉ាងនៅផ្នែកខាងក្រោមសួតខាងស្ដាំរបស់អ្នកជំងឺ។

គ្រូពេទ្យក៏បានធ្វើការឆ្លុះមើលសួតដោយប្រើម៉ាស៊ីនទំនើប Bronchoscopy ហើយក៏រកឃើញថា អ្នកជំងឺបានកើតមានរោគផ្សិតក្នុងសួតដែលបណ្ដាលមកពីផ្សិត Aspergillus។ គ្រូពេទ្យក៏បានសួរទៅបុរសជាអ្នកជំងឺថាមូលហេតុអ្វីបានបណ្ដាលឱ្យក្លាយជាបែបនេះ ដោយបុរសរូបនោះសារភាពថា លោកទម្លាប់ហិតស្រោមជើងកង្វក់របស់ខ្លួនឯងជាប្រចាំក្រោយចេញពីធ្វើការ មុនបើពួកវាចូលទៅក្នុងម៉ាស៊ីនបោកខោអាវ។

ក្រោយមក វេជ្ជបណ្ឌិតផ្នែកប្រព័ន្ធផ្លូវដង្ហើមប្រចាំមន្ទីរពេទ្យដែលបុរសរូបនោះទទួលការព្យាបាលក៏បានពិនិត្យលើស្រោមជើងរបស់អ្នកជំងឺហើយក៏រកឃើញថាពិតជាមានមេរោគផ្សិត Aspergillus ប្រាកដមែន ទើបគ្រូពេទ្យសន្និដ្ឋានថាទម្លាប់គគ្រិចរបស់អ្នកជំងឺរូបនេះគឺជាដើមហេតុបណ្ដាលឱ្យឆ្លងរោគចូលសួតបែបនេះ៕