បុរសជនជាតិចិនវ័យ ៣៥ ឆ្នាំម្នាក់ ជឿថាការងារ និង ជីវិតរៀបការគឺជារឿងគ្មានប្រយោជន៍ ហើយងាកទៅចាយជីវិតរស់នៅក្នុងរូងភ្នំម្នាក់ឯងរយៈពេល ៤ ឆ្នាំយ៉ាងមានក្ដីសុខ។
បុរសខាងលើត្រូវបានស្គាល់ឈ្មោះថា Min Hengcai ជាអ្នកខេត្ត Sichuan ប្រទេសចិន បានសម្រេចចិត្តចាកចេញពីជីវិតទីក្រុងអ៊ូអរទៅរស់នៅក្នុងរូងភ្នំដែលជាកន្លែងស្ងប់ស្ងាត់ផ្ដល់ក្ដីសុខផ្លូវចិត្ត។ តាមព័ត៌មានបានឱ្យដឹងថា កាលពីចុងឆ្នាំ ២០២១ កន្លងទៅ លោក Min បានបោះបង់ចោលការងារជាអ្នកបើកឡានសេវាកម្ម e-hailing ដែលការងារនេះអាចឱ្យលោករកប្រាក់ចំណូលបាន ១ ម៉ឺនយ័ន (១៤០០ ដុល្លារ) ក្នុងមួយខែ ហើយវិលត្រឡប់ទៅស្រុកកំណើតវិញដើម្បីចាយជីវិតជាខ្លួនឯង។
តាមការបញ្ជាក់របស់លោក Min បាននិយាយថា លោកគិតថាការធ្វើការងារគឺគ្មានន័យអីទេ ដោយកាលមុនលោកធ្លាប់ធ្វើការមួយថ្ងៃ ១០ ម៉ោង ដើម្បីតែយកលុយមកដោះបំណុលដែលជំពាក់សាច់ញាតិខ្លួនឯង។ លោកបន្ថែមទៀតថា មកទល់ឥលូវលោកនៅជំពាក់ធនាគារ និង ក្រុមហ៊ុនកម្ចីចំនួន ៣០ ម៉ឺនយ័ន (៤២ ០០០ ដុល្លារ) ទៀត។ យ៉ាងណាមិញ លោកបានបោះបង់ការសងទៅម្ចាស់លុយទាំងនោះហើយ ដោយលើកបញ្ជាក់ថា សាច់ញាតិរបស់លោកបានលក់ទ្រព្យរបស់លោកដែលទុកប្រើប្រាស់សម្រាប់ដោះបំណុលនោះហើយ។
លោកបានធ្វើការដូរដីខ្លួនឯងជាមួយអ្នករស់នៅក្នុងភូមិជាមួយគ្នា ដោយដីរបស់អ្នកភូមិរូបនោះមានទំហំត្រឹមមួយភាគបួននៃដីលោកប៉ុណ្ណោះ តែដោយសារតែដីគេនោះមានរូងភ្នំជិតហ្នឹងទើបលោកសម្រេចចិត្តដូរគ្នា។ ជីវិតក្រោយរស់នៅក្នុងរូងភ្នំ លោក Min តែងងើបនៅម៉ោង ៨ ព្រឹកជារៀងរាល់ថ្ងៃ ចំណាយពេលពេញមួយថ្ងៃអានសៀវភៅ ដើរលំហែ និង ធ្វើការងារលើដីចម្ការ។ លោកគេងទៅវិញនៅម៉ោង ១០ យប់ ហើយចំពោះអាហារវិញគឺលោកភាគច្រើនញ៉ាំតែបន្លែដែលខ្លួនឯងដាំដុះ៕
