បុរសម្នាក់ត្រូវប្រទះឃើញបែកពពុះមាត់ស្លា./ ប់ក្នុងឡាន ក្រោយជក់បារីអេឡិចត្រូនិចក្នុងពិធីខួបកំណើតមិត្តភក្តិ

បុរសម្នាក់ត្រូវបានប្រទះឃើញស្លាប់ក្នុងឡានកាលពីថ្ងៃទី ២១ ខែមេសា ឆ្នាំ ២០២៥ កន្លងទៅ (ពេលវេលាក្នុងតំបន់) ក្រោយកើតការមិនស្រួលខ្លួនពីការជក់បារីអេឡិចត្រូនិចក្នុងពិធីជប់លៀងខួបកំណើតមិត្តភក្តិនៅក្រុង Kuala Lumpur ប្រទេសម៉ាឡេស៊ី នៅយប់មុនកើតហេតុថ្ងៃទី ២០ ខែមេសា។

តាមការបញ្ជាក់ពីមេប៉ូលិសក្រុង Kuala Lumpur លោក Datuk Rusdi Mohd Isa បានឱ្យដឹងថា ជនរងគ្រោះមានវ័យ ៣៤ ឆ្នាំ ត្រូវបានប្រទះឃើញស្លាប់ក្នុងឡានរបស់លោកដែលចតចោលនៅខាងក្រៅទីតាំងកន្លែងជប់លៀងខួបកំណើត។ លោកបានរៀបរាប់ថា៖ «នៅវេលាម៉ោងប្រមាណជា ៨ ព្រឹកថ្ងៃទី ២១ ខែមេសា មិត្តភក្តិរបស់ជនរងគ្រោះបានប្រទះឃើញលោកដេកបែកពពុះមាត់ក្នុងឡាន ដោយក្រោយមកទើបដឹងថាលោកបានស្លាប់បាត់ទៅហើយ»។

ជនរងគ្រោះបានទៅកាន់ទីតាំងជប់លៀងខួបកំណើតមិត្តភក្តិនៅយប់ថ្ងៃទី ២០ ខែមេសា ដោយនៅទីនោះលោកត្រូវបានឱ្យដឹងថាបានជក់បារីអេឡិចត្រូនិច។ លោក Datuk Rusdi Mohd Isa បានរៀបរាប់ទៀតថា៖ «នៅពេលកំពុងជប់លៀងនោះ ជនរងគ្រោះមានការពិបាកដកដង្ហើម និង ឡើងកម្ដៅក្នុងខ្លួន ដូច្នេះលោកក៏បានចេញពីក្នុងហាងទៅខាងក្រៅដើម្បីស្រូបខ្យល់អាកាសខ្លះ ដោយបន្ទាប់មកក៏ចូលទៅក្នុងឡានបើកម៉ាស៊ីនត្រជាក់ឱ្យត្រជាក់ខ្លួន»។ ក្រោយមក បុរសរូបនោះក៏បានសន្លប់បាត់មាត់បាត់កមុនពេលបែកពពុះមាត់រហូតផុតដង្ហើមទៅ។

សាកសពជនរងគ្រោះត្រូវបានបញ្ជូនទៅកាន់មន្ទីរពេទ្យដើម្បីធ្វើកោសល្យវិច័យ ដោយខាងអាជ្ញាធរកំពុងរង់ចាំលទ្ធផលតេស្តរកសារធាតុពុលក្នុងខ្លួន មុនប្រកាសពីមូលហេតុពិតប្រាកដនៃការស្លាប់៕

ប្រភព៖ World Of Buzz