បុរសម្នាក់តូចចិត្តស្អិតទ្រូង ខំបណ្ដើរសត្វក្រពាសំណព្វចិត្តទៅលេងផ្សារទំនើប តែគេហាមមិនឱ្យចូល

រឿងរ៉ាវរបស់បុរសម្នាក់ និង សត្វចិញ្ចឹមដ៏ចម្លែករបស់លោក ដែលត្រូវបានខាងផ្សារទំនើបបដិសេធមិនឱ្យចូលផ្សារនៅរដ្ឋ Pennsylvania សហរដ្ឋអាមេរិក កំពុងធ្វើឱ្យមហាជនជាច្រើនចាប់អារម្មណ៍ខ្លាំង។

បុរសរូបនោះត្រូវបានស្គាល់ឈ្មោះថា Wesley Silva និង សត្វចិញ្ចឹមសំណព្វចិត្តដែលជាសត្វក្រពារបស់លោកមានឈ្មោះថា Jinseioshi។ រឿងហេតុបានកើតឡើងនៅពេលលោក Silva នាំសត្វក្រពារបស់លោកចូលក្នុងផ្សារទំនើបក្នុងតំបន់ ប៉ុន្តែទាំងម្ចាស់ និង សត្វ ត្រូវបានបុគ្គលិកផ្សារបដិសេធមិនឱ្យចូលឡើយ ដែលជាហេតុធ្វើឱ្យលោកភ្ញាក់ផ្អើល និង មានការអាក់អន់ស្រពន់ចិត្តជាខ្លាំង។

សត្វក្រពាឈ្មោះ Jinseioshi មានទម្ងន់ប្រមាណ ១៤.៥ គីឡូក្រាម និង មានពាក់អាវគួរឱ្យទាក់ទាញដូចសត្វចិញ្ចឹមឆ្កែឆ្មាដូច្នោះដែរ។ រឿងរ៉ាវរបស់ពួកគេគឺផ្ទុះការចាប់អារម្មណ៍មែនទែនរហូតដល់ថ្នាក់មានអ្នករស់នៅក្នុងតំបន់ជាមួយនាំគ្នាសម្រុកដើម្បីជួបម្ចាស់ និង លេងសត្វចិញ្ចឹមដ៏ចម្លែកទាក់ទាញនេះផងដែរ៕