មេធំក្រុមហ៊ុន Meta លោក Mark Zuckerberg ត្រូវបានមេធាវីម្នាក់ឈ្មោះ Mark Zuckerberg ដូចគ្នា ដាក់ពាក្យប្ដឹង ព្រោះតែ Facebook បានបិទគណនីរបស់លោកជាច្រើនដង។
លោកមេធាវី Mark Zuckerberg នៅសប្ដាហ៍នេះ បានដាក់ពាក្យប្ដឹង CEO ក្រុមហ៊ុន Meta នៅតុលាការសង្កាត់ Indiana ក្រោយគណនីហ្វេសប៊ុករបស់លោកត្រូវបានបិទញយដង ដែលជាហេតុធ្វើឱ្យលោកពិបាកក្នុងការប្រកបរបររកស៊ីព្រោះតែមានឈ្មោះដូចនឹងបុគ្គលល្បីរូបនេះ។ តាមការរៀបរាប់ លោកបានប្រើប្រាស់គណនីផ្ទាល់ខ្លួនដែលចាយលុយសម្រាប់ផ្សព្វផ្សាយពីការអនុវត្តច្បាប់ រួមទាំងដើម្បីធ្វើការទំនាក់ទំនងជាមួយភ្ញៀវសំខាន់ៗមួយចំនួន ប៉ុន្តែគណនីនោះបែរជាត្រូវបិទដល់ទៅ ៥ ដង ក្នុងរយៈពេល ៨ ឆ្នាំ ដោយហេតុផលចោទថា លោកបន្លំធ្វើជាស្ថាបនិកក្រុមហ៊ុនហ្វេសប៊ុក។
លោកបានឱ្យដឹងទៀតថា លោកចំណាយប្រាក់ប្រមាណជាង ១១០០០ ដុល្លារ លើការផ្សាយពាណិជ្ជកម្មសម្រាប់ profile ហ្វេសប៊ុកខ្លួន ប៉ុន្តែនៅពេលគណនីនោះបានបិទ ខាងហ្វេសប៊ុកគឺមិនសងលុយឱ្យលោកវិញឡើយ។ លោកបានទាក់ទងបណ្ដាញសង្គមមួយនេះក្នុងឆ្នាំ ២០១៧ និង ឆ្នាំ ២០២០ ប៉ុន្តែមិនទទួលបានការឆ្លើយតបអ្វីឡើយ។
បន្ថែមពីនេះ ជាការបញ្ជាក់ថាឈ្មោះរបស់លោកពិតជា Mark Zuckerberg មែន លោកក៏បានបង្កើតវិបសាយមួយផ្សេងដាក់ថា «iammarkzuckerberg.com» ដើម្បីទម្លាយពីការផ្លាស់ប្ដូរ និង ការរំខានក្នុងជីវិតរបស់លោកដែលមានឈ្មោះដូចទៅនឹងបុគ្គលល្បី។ ពេលគណនីរបស់លោកមិនទាន់ត្រូវគេបិទ លោកទទួលបាន friend request ជាង ១០០ នាក់ជារៀងរាល់ថ្ងៃ ដោយសារអ្នកទាំងនោះច្រឡំថាលោកជាម្ចាស់ក្រុមហ៊ុន Meta ឬទទួលបានការប្ដឹង និង ស្នើឱ្យលោកជួយ improve ហ្វេសប៊ុកក៏មាន។ លើសពីនេះ លោកថែមទាំងត្រូវបានរដ្ឋ Washington ដាក់ពាក្យប្ដឹង ព្រោះច្រឡំថាជា CEO ហ្វេសប៊ុកទៀតផង។
ថ្លែងប្រាប់សារព័ត៌មាន NYPost លោកមេធាវីខាងលើបានសង្កត់ធ្ងន់ថា លោកគ្មានចេតនាណាមួយដើម្បីធ្វើបាបនាយកប្រតិបត្តិក្រុមហ៊ុន Meta នោះឡើយ ប៉ុន្តែលោកគ្រាន់តែចង់ឱ្យអ្វីៗគ្រប់យ៉ាងមានតម្លាភាពជាងនេះប៉ុណ្ណោះ។ ដោយឡែក ខាងអ្នកតំណាងក្រុមហ៊ុន Meta ក៏បានចេញមកឆ្លើយតបលើករណីនេះដែរថា៖ «ពួកយើងដឹងថាមាន Mark Zuckerberg ច្រើននាក់ក្នុងពិភពលោកនេះ ហើយយើងក៏កំពុងពិនិត្យលើបញ្ហានេះផងដែរ»៕
ប្រភព៖ VN Express
