កាលពីសប្ដាហ៍កន្លងទៅ ព័ត៌មាននៃការបាត់បង់ជីវិតភ្លាមៗរបស់តារាសម្ដែង Yu Menglong ដោយសារការធ្លាក់ពីលើអគារ បានធ្វើឱ្យសាធារណជនជាច្រើនតក់ស្លុត និង សោកស្ដាយជាខ្លាំង ហើយចាប់តាំងពីថ្ងៃកើតហេតុមកទល់ពេលនេះ មហាជនគឺនៅតែមានការសង្ស័យ និង ចម្ងល់ជាច្រើនជុំវិញមូលហេតុស្លាប់របស់តារាប្រុសខាងលើ បើទោះជាប៉ូលិសបញ្ជាក់ថាមិនមែនជាករណីឃាតកម្មក៏ដោយ។
រហូតមកទល់ពេលនេះ នៅលើបណ្ដាញសង្គមចិន Weibo សង្កេតឃើញមានការ update ថ្មីបន្តបន្ទាប់ពាក់ព័ន្ធនឹងករណីរបស់ Yu Menglong។ ជាក់ស្ដែង ថ្មីៗនេះ មានការទម្លាយកាន់តែលម្អិតបន្ថែមនៅយប់ជប់លៀងមុនពេលកើតហេតុបានឱ្យដឹងថា ទីតាំងជប់លៀងនៅយប់នោះគឺនៅ penthouse ក្នុងអគារអាផាតមិនដ៏ប្រណីតមួយនៅសង្កាត់ Chaoyang ក្រុងប៉េកាំង ប្រទេសចិន។ ម្ចាស់ផ្ទះគឺជាអ្នកតែងនិពន្ធសាច់រឿង (screenwriter) ម្នាក់ដែលជាមិត្តជិតស្និទ្ធយូរឆ្នាំរបស់ Yu Menglong។
តាមកាមេរ៉ាសុវត្ថិភាពពីអ្នកគ្រប់គ្រងអគារបានបង្ហាញថា កម្មវិធីជប់លៀងនោះគឺចាប់ផ្ដើមនៅម៉ោង ៨ និង ១៥ នាទីយប់រហូតដល់ម៉ោង ២ និង ៤០ នាទីទាបភ្លឺ។ គ្រឿងស្រវឹងដែលពួកគេទទួលទាននៅយប់នោះរួមមានស្រា spirit ចំនួន ១០ ដប ស្រាបៀ ២៤ ដប និង ស្រាក្រហមចំនួន ៤ ដប និង មានមនុស្សចូលរួមសរុបចំនួន ១៧ នាក់។ តាមសម្ដីរបស់មីងអនាម័យដែលសម្អាតទីតាំងជប់លៀងនៅថ្ងៃបន្ទាប់នោះបានរៀបរាប់ថា ក្នុងបន្ទប់ទទួលភ្ញៀវទាំងមូលធុំក្លិនស្រាឡើងហួង និង មានស្នាមកម្អួតប្រឡាក់លើសាឡុង ហើយធុងសំរាមវិញគឺពោរពេញទៅដោយក្រដាសជូតមាត់ និង ដបស្រា។
តាមកាមេរ៉ាសុវត្ថិភាពពីជណ្ដើរយន្តវិញបានទម្លាយថា នៅម៉ោង ១ និង ៥០ នាទីយប់ Yu Menglong ត្រូវបុរស ២ នាក់ក្រៀរចូលជណ្ដើរយន្ត ទាំងមុខមាត់ស្លេកស្លាំង ហើយដៃជើងទន់អស់ រួមនិយាយខ្សាវៗថា៖ «ឈប់ផឹកទៀតហើយ» ប៉ុន្តែបុរសដែលគេស្គាល់ថាជាអ្នកគ្រប់គ្រង បាននិយាយជំរុញថា៖ «ផឹកកែវចុងក្រោយទៅ កុំឱ្យគ្រប់គ្នាខូចអារម្មណ៍»។
ដោយឡែកមាន director ម្នាក់បានចេញមកបដិសេធថាមិនបានមានវត្តមាននៅទីតាំងកើតហេតុឡើយ ប៉ុន្តែតាមកាមេរ៉ាសុវត្ថិភាពបង្ហាញច្បាស់ៗថា រូបគេបានអង្គុយក្បែរ Yu Menglong។ នៅថ្ងៃផ្ទុះផ្អើលព័ត៌មានថា Yu Menglong ទទួលមរណភាពនោះ director រូបនោះបានចេញមុខមកប្រកាសភ្លាមៗថា៖ «Yu Menglong និង ខ្ញុំគឺគ្មានទំនាក់ទំនងជិតស្និទ្ធអ្វីឡើយ ហើយនៅយប់នោះ ខ្ញុំស្នាក់នៅក្នុងផ្ទះកែ script មិនបានចេញទៅណាឡើយ»។ យ៉ាងណាមិញ អ្នកលេងបណ្ដាញសង្គម Weibo អះអាងថា director រូបនេះបាននិយាយកុហក ព្រោះបើតាមកាមេរ៉ាសុវត្ថិភាពនៅ lobby បានបង្ហាញឱ្យឃើញថាលោកបានចូលជណ្ដើរយន្តនៅម៉ោង ៩ និង ២៧ នាទីយប់ ពាក់អាវឈុត និង កាន់ស្រាចំនួន ២ ដប។ ដល់ម៉ោង ២ និង ០៣ នាទីទាបភ្លឺ director រូបនោះក៏ឃើញប្រញាប់ប្រញាល់ចេញទៅវិញម្នាក់ឯង រហូតដល់ថ្នាក់ដើរបុកធុងជូតសម្អាត។
បើនិយាយពីអ្នកគ្រប់គ្រងដែលជំរុញឱ្យ Yu Menglong ផឹកស្រាវិញ ក៏គួរឱ្យសង្ស័យខ្លាំងដូចគ្នា។ នៅមួយម៉ោងមុនកើតហេតុ រូបគេទទួលបានការតេចូលចំនួន ៣ ដងពីជនអនាមិកម្នាក់ ហើយពេលនោះ Yu Menglong គឺមានការស្រពន់អន់ចិត្តខ្លាំងដោយសារស្រវឹងផង។ ការខលចូលលើកចុងក្រោយគឺនៅម៉ោង ២ និង ១០ នាទីទាបភ្លឺ ដោយក្រោយស្ដាប់រួច រូបគេក៏បានប្រាប់ឱ្យគ្រប់គ្នាចាកចេញភ្លាមៗ។ គួរបញ្ជាក់ដែរថា ការខលចូលទាំង ៣ លើកនោះគឺថាមកពីលេខក្លែងក្លាយដែលបានលុបចោលក្រោយហេតុការណ៍កើតឡើង។
មកដល់ថ្ងៃទី ៣ ក្រោយកើតហេតុ ម្ចាស់ផ្ទះដែលជាអ្នកតែងនិពន្ធសាច់រឿងនោះ បានផ្លាស់ទីភ្លាមៗទាំងយប់។ អ្នកជិតខាងបាននិយាយថា មានបុរស ៤ នាក់បានមកទីនោះនៅម៉ោង ៤ ភ្លឺ ហើយរើប្រអប់អីវ៉ាន់មួយចំនួនចេញទៅ។ អ្នកតែងនិពន្ធរឿងរូបនោះមើលទៅភ័យស្លន់ណាស់ បន្តិចៗឆែកមើលទូរស័ព្ទ ហើយក៏ដើរចូលឡាន SUV ពណ៌ខ្មៅគ្មានផ្លាកលេខមួយគ្រឿងបាត់ទៅ។ ជាមួយគ្នានោះដែរ ប៉ូលិសក៏បានបញ្ជាក់ថា អ្នកតែងនិពន្ធរូបនោះបច្ចុប្បន្នកំពុងបាត់ខ្លួន ដោយសញ្ញាពីទូរស័ព្ទរបស់លោកចុងក្រោយបង្អស់ឃើញនៅទីតាំងទីក្រុងដាច់ស្រយាលមួយនៅ Hebei។ កងកម្លាំងបច្ចុប្បន្នបានប្រមូលរាល់ភស្តុតាងពីកាមេរ៉ាសុវត្ថិភាព និង បានកោះហៅមនុស្សចំនួន ៨ រូបយកមកស៊ើបអង្កេត។
ការបង្ហោះដ៏លម្អិតលើបណ្ដាញសង្គម Weibo នេះដែរ គឺទទួលបានការចាប់អារម្មណ៍ជាខ្លាំងរហូតមានការផ្ទុះវែកញែកយ៉ាងក្ដៅគគុក។ មនុស្សជាច្រើនគឺតក់ស្លុតនឹងដំណើររឿងលម្អិតដែលបានបង្ហាញនេះ ហើយពួកគេក៏ជឿថា Yu Menglong ពិតជាត្រូវបានគេសម្លាប់ពិតមែន។ យ៉ាងណាមិញ ក៏មានមនុស្សមួយចំនួនទៀតរក្សាភាពស្ងៀមស្ងាត់រង់ចាំលទ្ធផលពីការស៊ើបអង្កេតរបស់ប៉ូលិសដើម្បីបញ្ជាក់ការពិតជុំវិញករណីនេះ៕
ប្រភព៖ Kenh14
