ភ្នំភ្លើង Kanlaon នៅភាគកណ្ដាលប្រទេសហ្វីលីពីន បានផ្ទុះឡើងនៅយប់ទៀបភ្លឺឈានចូលថ្ងៃទី ១៣ ខែឧសភា ឆ្នាំ ២០២៥ នេះ ដោយជះបាចសាចផ្សែង និង ផេះក្នុងកម្ពស់រហូតដល់ ៤៥០០ ម៉ែត្រឡើងទៅលើអាកាស។
តាមការប្រកាសពីខាងវិទ្យាស្ថានផ្នែកភ្នំភ្លើង និង រញ្ជួយដីប្រចាំប្រទេសហ្វីលីពីន (PHIVOLCS) បានឱ្យដឹងថា៖ «ភ្នំ Kanlaon បានផ្ទុះក្នុងកម្រិតមធ្យមនៅវេលាម៉ោង ២ និង ៥៥ នាទីទៀបភ្លឺថ្ងៃទី ១៣ខែឧសភា ឆ្នាំ ២០២៥ ដោយដំណើរការផ្ទុះនេះមានរយៈពេលប្រមាណជា ៥ នាទី។ ការផ្ទុះនេះបានជះផេះយ៉ាងខ្មួលខ្មាញ់លើអាកាសប្រមាណជា ៤.៥ គីឡូម៉ែត្រ បក់ផាត់ទៅភាគនិរតី»។
តាមវិទ្យាស្ថានដដែលនេះបានបញ្ជាក់ទៀតថា បំណែកថ្មធំៗដែលផ្ទុះចេញពីមាត់ភ្នំភ្លើងបានហោះខ្ទាតចេញរាប់រយម៉ែត្រមកព្រៃក្បែរកំពូលភ្នំបង្កជាការឆេះព្រៃផងដែរ។ ខាងសហគមន៍ដែលប៉ះពាល់ដោយផេះភ្លើងត្រូវបានណែនាំឱ្យមានការប្រុងប្រយ័ត្នជាចាំបាច់ ត្រូវពាក់ម៉ាស់ ឬកំណាត់សើមដើម្បីបញ្ចៀសការស្រូបធូលីផេះចូលរាងកាយ។
ជាការពិតណាស់ គ្រោះរញ្ជួយដី និង ការផ្ទុះភ្នំភ្លើងគឺងាយនឹងកើតមានឡើងណាស់ក្នុងប្រទេសហ្វីលីពីន ដោយសារតែទីតាំងប្រទេសនេះស្ថិតនៅចិញ្ចៀនភ្លើងប៉ាស៊ីហ្វិក (Pacific Ring of Fire) ដែលជាតំបន់បន្ទះតិចតូនិចប៉ះគ្នា៕
