រដ្ឋមន្ត្រីក្រសួងដឹកជញ្ជូនប្រទេសតួកគី លោក Urkish Abdulkadir Uraloglu ត្រូវប៉ូលិសផាកពិន័យអស់ប្រាក់រាប់រយដុល្លារ ក្រោយបើកបរលើសល្បឿនកំណត់នៅលើផ្លូវជាតិ Ankara-Nigde។
ដើមហេតុដែលប៉ូលិសរកឃើញលោកបើកលើសល្បឿន គឺនៅពេលរូបលោកបង្ហោះវីដេអូមួយលើបណ្ដាញសង្គម បង្ហាញសកម្មភាពកំពុងតែបើកឡាននៅលើដងផ្លូវ។ ក្នុងវីដេអូនោះដែរ លោក Uraloglu បានបើកឡានបណ្ដើរស្ដាប់ចម្រៀងបណ្ដើរ ប៉ុន្តែអ្វីដែលធ្វើឱ្យគេចាប់អារម្មណ៍នោះគឺលេខល្បឿនក្នុងឡានរបស់លោកបានបង្ហាញល្បឿនបើករបស់លោកពេលនោះចន្លោះពី ១៩០ ទៅ ២២៥ គីឡូម៉ែត្រក្នុងមួយម៉ោង ខណៈផ្លូវមួយនោះល្បឿនកំណត់ឱ្យបើកត្រឹម ១៤០ គីឡូម៉ែត្រក្នុងមួយម៉ោង។
ភស្តុតាងបញ្ជាក់ច្បាស់ លោករដ្ឋមន្ត្រីក៏ព្រមទទួលស្គាល់ថាលោកពិតជាបើកលើសល្បឿនកំណត់ពិតប្រាកដមែន និង សន្យាថានឹងប្រុងប្រយ័ត្នជាងនេះនៅពេលក្រោយៗ។ លោក Uraloglu ក៏បានបង្ហោះប័ណ្ណផាកពិន័យផងដែរ ដោយលោកបញ្ជាក់ថាលោកត្រូវពិន័យអស់ ៩២៦៧ លីរ៉ា (ប្រមាណ ២២៥ ដុល្លារ)៕
