សួនសត្វមួយនៅចិនដាក់លក់ទឹកនោមខ្លា មួយដបលក់ថ្លៃជិត ៧ ដុល្លារ ហើយថាជួយព្យាបាលជំងឺសន្លាក់

សួនសត្វមួយកន្លែងក្នុងប្រទេសចិន បានធ្វើឱ្យមនុស្សជាច្រើនឆ្ងល់បើកភ្នែកធំៗ ក្រោយឃើញមានការដាក់លក់ទឹកនោមខ្លាដំបងច្រកដបចំណុះប្រមាណ ២៥០ ក្រាម ដោយលក់ក្នុងមួយដបតម្លៃ ៥០ យ័ន (ប្រមាណ ៦.៩៦ ដុល្លារ)។

ផលិតផលដ៏ប្លែកមិនធ្លាប់ឃើញមានលក់ពីមុននេះដែរ ត្រូវបានថតបង្ហោះដោយអ្នកចូលលេងសួនសត្វម្នាក់ ដែលបានបញ្ជាក់ថា ខាងសួនបានដាក់លក់ទឹកនោមខ្លាដោយអះអាងថា វាអាចជួយព្យាបាលជំងឺសន្លាក់ និង បញ្ហារលាកសន្លាក់។

អ្វីដែលកាន់តែលម្អិតនោះ នៅលើដបទឹកនោមខ្លានោះបានរៀបរាប់ពីអត្ថប្រយោជន៍ជាច្រើនដូចជាជួយព្យាបាលសន្លាក់ បញ្ហារមួលក្រពើ និង ឈឺចាប់សាច់ដុំជាដើម។ ជាងនេះទៅទៀតនោះ គេថែមប្រាប់ពីរបៀបផឹក ដោយព្រមានថាបើផឹកហើយមានប្រតិកម្មអាឡែកហ្ស៊ី គួរឈប់បន្តផឹកទៀត។

តាមសម្ដីបញ្ជាក់ពីបុគ្គលិកសួនសត្វម្នាក់ប្រាប់សារព័ត៌មាន The Paper បានលើកឡើងថា ទឹកនោមខ្លាដែលគេហៅថា «ទឹកថ្នាំ» មួយនេះ គឺយកចេញពីទឹកនោមខ្លាពិតៗ ប៉ុន្តែមិនបានបញ្ជាក់ឱ្យច្បាស់ឡើយថា ពួកគេបានធ្វើការសម្លាប់មេរោគឬអត់ មុននឹងយកមកដាក់លក់បែបនេះ។ ខាងបុគ្គលិកបានបន្ថែមទៀតថា ផលិតផលពួកគេគឺលក់បានគួរសម ដោយមួយថ្ងៃអាចលក់បាន ២ ដបដែរ។

យ៉ាងណាមិញ បើតាមអ្នកជំនាញពីពេទ្យផ្នែកឱសថបុរាណចិននៅខេត្ត Hubei បានបញ្ជាក់ថា ទឹកនោមខ្លាគឺមិនចាត់ចូលជាឱសថបុរាណនោះឡើយ ហើយក៏គ្មានភស្តុតាងណាបញ្ជាក់ពីអត្ថប្រយោជន៍របស់វានោះដែរ។ លោកបានធ្វើការណែនាំដល់មនុស្សទាំអស់ឱ្យធ្វើការព្យាបាលជាមួយថ្នាំច្បាស់លាស់ត្រឹមត្រូវ ចៀសវាងការបង្កឱ្យសុខភាពកាន់តែធ្ងន់ធ្ងរ។

ខាងអ្នកជំនាញផ្នែកឱសថបុរាណម្នាក់ទៀតក៏បានលើកជាសំណួរដែរថា ខាងសួនសត្វមានសិទ្ធិលក់ផលិតផលថ្នាំបែបនេះបានដែរឬ ទាំដែលរាល់ថ្នាំដាក់ឱ្យប្រើប្រាស់បានទាល់តែមានការអនុម័តពីរដ្ឋាភិបាលនោះ។ ទោះជាយ៉ាងណា ខាងបុគ្គលិកសួននៅទទូចអះអាងថា ពួកគេគឺអាជ្ញាប័ណ្ណត្រឹមត្រូវក្នុងការលក់ទឹកនោមខ្លានេះ៕

ប្រភព៖ World Of Buzz