នៅចិន! ព្រះសង្ឃសៅលិញ ៣០ អង្គ សម្រេចចាកចេញពីវត្ត ព្រោះចៅអធិការទើបឡើងកាន់តំណែងថ្មី ចេញច្បាប់តឹងរ៉ឹងខ្លាំងពេក

ព្រះសង្ឃសៅលិញជាង ៣០ អង្គ នៅប្រទេសចិន បានសម្រេចចិត្តចាកចេញពីវត្ត ក្រោយព្រះចៅអធិការថ្មី Shi Yinle ដាក់ចេញច្បាប់វិន័យតឹងរ៉ឹងខ្លាំង។ ព្រះចៅអធិការវត្តសៅលិញថ្មី Shi Yinle បានឡើងគ្រប់គ្រងវត្តជំនួសអតីតចៅអធិការ Shi Yongxin ក្រោយរកឃើញថាបានបន្លំលុយវត្ត មានស្រី និង មានកូនថែមទៀត។

តាមរបាយការណ៍ព័ត៌មានពី South China Morning Post បានឱ្យដឹងថា ព្រះចៅអធិការ Shi Yinle ក្រោយប្រកាសក្លាយជាចៅអធិការវត្តសៅលិញផ្លូវការ កាលពីថ្ងៃទី ២៩ ខែកក្កដា ឆ្នាំ ២០២៥ កន្លងទៅមក ព្រះអង្គក៏បានប្រកាសដាក់ចេញច្បាប់វិន័យកែប្រែឡើងវិញចំនួន ៥ ចំណុច រួមមាន៖

១. ផ្អាកការសម្ដែងគុនផ្សព្វផ្សាយ
២. ហាមប្រាមមិនឱ្យមានការរៀបចំធ្វើពិធីដែលចាយតម្លៃខ្ពស់
៣. លុបចោលលែងឱ្យមានហាងលក់ទំនិញក្នុងវត្ត
៤. លើកកម្ពស់ភាពម្ចាស់ការរបស់ព្រះសង្ឃតាមរយៈការធ្វើកសិកម្ម
៥. ផ្លាស់ប្ដូរការចែកចាយប្រាក់ចំណូលដោយលុបបំបាត់ថ្លៃសេវាដែលរងការរិះគន់ពីមុន

តាមព្រះចៅអធិការខាងលើបានរៀបរាប់ថា ព្រះសង្ឃក្នុងវត្តឥលូវបានប្រាសចាកពីមាគ៌ា ប្រតិបត្តិធម៌មិនបានត្រឹមត្រូវនោះឡើយ។ ព្រះអង្គបានលើកឧទាហរណ៍ថា ព្រះសង្ឃមួយចំនួនបានកុម្មង់អាហារទៅបន្ទប់សមាធិ ហើយថែមទាំងស្ដាប់បទចម្រៀងប៉ុបអំឡុងពេលសូត្រធម៌ជាដើម។ យ៉ាងណាមិញ តាមច្បាប់វិន័យថ្មីនេះ ព្រះសង្ឃក្នុងវត្តទាំងអស់ត្រូវសូត្រធម៌ពេលព្រឹកនៅម៉ោង ៤ កន្លះ បន្ទាប់មក ទៅធ្វើកសិកម្ម មុនហាត់ក្បាច់គុនបុរាណ។

ចំពោះទូរស័ព្ទវិញគឺតម្រូវឱ្យទុកក្នុងបន្ទប់សម្រាប់រក្សាទុក ហើយការកម្សាន្តគ្រប់ទម្រង់នឹងត្រូវហាមប្រាមដាច់ខាត។ ការមើលទូរស័ព្ទគឺកាត់បន្ថយមកត្រឹម ៣០ នាទីក្នុងមួយថ្ងៃ។ ចំពោះព្រះសង្ឃអង្គណាដែលបរាជ័យច្បាប់វិន័យថ្មីនេះរយៈពេល ៣ ខែជាប់ៗគ្នា អាចនឹងតម្រូវឱ្យចាកចេញពីវត្ត។

គួរបញ្ជាក់ដែរថា ការដាក់ចេញច្បាប់វិន័យថ្មីដ៏តឹងរ៉ឹងពីសំណាក់ព្រះចៅអធិការថ្មីនេះដែរ បានបណ្ដាលឱ្យព្រះសង្ឃជាច្រើនអង្គក្នុងវត្តសម្រេចចាកចេញ ប៉ុន្តែមិនមានរបាយការណ៍ច្បាស់ការណាបញ្ជាក់ថា ព្រះសង្ឃទាំងអស់នោះលាចាកសិក្ខាបទ ឬក៏ផ្លាស់ទៅកាន់វត្តថ្មីណាមួយឡើយ៕

ប្រភព៖ NDTV