ថ្មីៗនេះ ពលរដ្ឋក្នុងប្រទេសចិនកំពុងផ្ទុះល្បីវិធីសាស្ត្រធ្វើលំហាត់ប្រាណដ៏ចម្លែកមួយ ដោយតម្រូវឱ្យពាក់ក្រវាត់ខ្សែផ្អឹបនឹងក យោងខ្លួនយោកចុះឡើងៗរយៈពេលប៉ុន្មាននាទី ដោយជឿថាវិធីសាស្ត្របែបនេះជួយសម្រួលសរសៃជួយឱ្យគេងលក់ស្រួល។
តិចនិចលំហាត់ប្រាណដ៏ចម្លែកមួយនេះដែរត្រូវបានបង្កើតឡើងដោយបុរសម្នាក់ឈ្មោះ Sun Rongchun រស់នៅក្រុង Shenyang ប្រទេសចិន ដែលរូបលោកជាអ្នកកើតមានជំងឺលៀនឌីសឆ្អឹងកញ្ចឹងក (cervical spondylosis) និង ជំងឺគេងមិនលក់រ៉ាំរ៉ៃ។ លោក Sun បាននិយាយថា ការពាក់ខ្សែក្រវាត់ទ្រ-កបែបនេះគឺជួយកាត់បន្ថយសម្ពាធឆ្អឹងខ្នង កាត់បន្ថយការឈឺចាប់ និង ជួយឱ្យគេងលក់ស្រួល។
នៅលើបណ្ដាញសង្គមក្នុងប្រទេសចិន វីដេអូជាច្រើននៃសកម្មភាពធ្វើលំហាត់ប្រាណដ៏ចម្លែកមួយនេះគឺបានទាក់ទាញអ្នកចូលមើលរហូតរាប់លាននាក់។ ជាក់ស្ដែង ឃ្លីបវីដេអូមួយបង្ហោះលើបណ្ដាញសង្គម X មានអ្នកចូលមើលជាង ១១ លានដង អមដោយខេបសិនថា៖ «អ្នកដែលសាកធ្វើវាបាននិយាយថា ពួកគេគេងលក់ស្រួលជាងមុន»។
យ៉ាងណាមិញ វិធីសាស្ត្រមួយនេះគឺមិនទទួលស្គាល់ដោយអ្នកជំនាញនោះឡើយ ដោយពួកគេបានព្រមានថាការធ្វើលំហាត់ប្រាណបែបនេះគឺគ្រោះថ្នាក់ខ្លាំងណាស់។ ជាក់ស្ដែង តាមការពន្យល់ពីវេជ្ជបណ្ឌិត Manish Chhabria អ្នកជំនាញផ្នែកសរសៃប្រសាទនៅប្រទេសឥណ្ឌា បាននិយាយថា៖ «ឆ្អឹងកង-ក គឺមិនមែនបង្កើតឡើងមកដើម្បីទ្រទម្ងន់រាងកាយមនុស្សទាំងមូលនោះទេ។ ការព្យួរ-កខ្លួនឯងបែបនេះអាចបណ្ដាលឱ្យខូចឆ្អឹងខ្នង និង សរសៃឈាមនៅត្រង់ក បង្កើនហានិភ័យនៃជំងឺដាច់សរសៃឈាមខួរក្បាល ពិការភាព ឬធ្ងន់ធ្ងរដល់ថ្នាក់បាត់បង់ជីវិត»៕
