គិតត្រឹមថ្ងៃទី ០៦ ខែសីហា ឆ្នាំ ២០២៥ នេះ ប្រទេសចិនរកឃើញមានអ្នកកើតជំងឺគ្រុនឈីក (Chikungunya) រហូតដល់ជាង ៧ ពាន់ករណី។ បើតាមអង្គការសុខភាពពិភពលោក (WHO) បានឱ្យដឹងថា ជំងឺគ្រុនឈីក មានអាការដូចជា ក្ដៅខ្លួន ឈឺក្បាល ឈឺសាច់ដុំ ឈឺចាប់តាមសន្លាក់ ឬចេញស្នាមអុតជាដើម។ រោគសញ្ញាទាំងនេះជាធម្មតាកើតឡើងរយៈពេល ៣ ទៅ ៧ ថ្ងៃក្រោយត្រូវមូសដែលផ្ទុកមេរោគនេះខាំ។
ករណីផ្ទុះឆ្លងនេះដែរ កើតឡើងខ្លាំងនៅទីក្រុង Foshan ខេត្ត Guangdong ហើយក៏បន្តរាលដាលឆ្លងដល់ហុងកុង ម៉ាកាវ និង ខេត្ត Hunan ទៀត នេះបើតាមការបញ្ជាក់ពីខាងមន្ត្រីសុខាភិបាល។ តាមការចេញផ្សាយរបស់ New York Times បានឱ្យដឹងថា នេះជាការផ្ទុះឆ្លងជំងឺគ្រុនឈីកទ្រង់ទ្រាយធំបំផុតគិតតាំងពីជំងឺនេះរកឃើញកើតមានក្នុងប្រទេសចិនក្នុងឆ្នាំ ២០០៨ មក។ បច្ចុប្បន្ន មិនមានការព្យាបាលជាក់លាក់ណាមួយសម្រាប់ជំងឺមួយនេះនោះឡើយ ប៉ុន្តែមានវ៉ាក់សាំងចាក់ការពារដែលណែនាំសម្រាប់អ្នកចង់ធ្វើដំណើរទៅទីតាំងដែលកំពុងផ្ទុះឆ្លងជំងឺនេះ។
យ៉ាងណាមិញ តាមការបញ្ជាក់ពីអ្នកនាំពាក្យក្រសួងការបរទេសប្រចាំប្រទេសចិនបានលើកឡើងថា ស្ថានភាពបច្ចុប្បន្នគឺអាចបញ្ចៀស គ្រប់គ្រង និង ព្យាបាលបាន។ ជាក់ស្ដែង ដើម្បីការពារការរាលដាលឆ្លងជំងឺគ្រុនឈីក ខាងអាជ្ញាធរបានប្រើប្រាស់ដ្រូនបាញ់ថ្នាំមូស ចុះត្រួតពិនិត្យតាមផ្ទះ ដាក់ពិន័យប្រសិនរកឃើញមានទឹកថ្លុកមិនសម្អាត និង បាញ់ថ្នាំការពារមូសខាំលើបុគ្គលិកការិយាល័យ មុនពេលពួកគេចូលអគារធ្វើការ។
គួរបញ្ជាក់ដែរថា កាលពីថ្ងៃទី ០១ ខែសីហា ឆ្នាំ ២០២៥ កន្លងទៅ ខាងនាយកដ្ឋានប្រយុទ្ធប្រឆាំងជំងឺឆ្លងនៅសហរដ្ឋអាមេរិក (CDC) បានដាក់ចេញការព្រមានកម្រិត ២ សម្រាប់អ្នកធ្វើដំណើរក្នុងប្រទេសចិន ដោយជំរុញឱ្យពលរដ្ឋទាំងអស់មានការប្រុងប្រយ័ត្នខ្ពស់ពេលធ្វើដំណើរទៅកាន់តំបន់ដែលផ្ទុះឆ្លង។ ជាមួយគ្នានោះដែរ ខាង CDC ក៏ដាក់ចេញការព្រមានស្រដៀងគ្នានេះសម្រាប់បណ្ដាប្រទេសផ្ទុះឆ្លងមួយចំនួនផ្សេងទៀតដូចជាប្រទេស បូលីវី, កេនយ៉ា, ម៉ាដាហ្គាស្កា, ម៉ូរីទីស, Mayotte, Reunion, Somalia និង ស្រីលង្កា៕
ប្រភព៖ Kenh14
