នៅថ្ងៃទី ១១ ខែកក្កដា ឆ្នាំ ២០២៥ នេះ សារព័ត៌មានថៃ Bangkok Post បានចេញផ្សាយករណីថ្មី ដោយអតីតព្រះសង្ឃមួយអង្គនៅវត្ត Phra Phutthachai នាក្រុង Saraburi សារភាពថាមានទំនាក់ទំនងស្នេហាយូរឆ្នាំជាមួយស្ត្រីម្នាក់ដែលគេហៅថា «Sika Golf» និង ថែមមានគម្រោងសឹកលាចាកសិក្ខាបទដើម្បីទៅរៀបការជាមួយនាងទៀតផង។ យ៉ាងណាមិញ ក្រោយមកទើបព្រះសង្ឃអង្គនោះរកឃើញថា ស្ត្រីដែលបានទាក់ទងជាមួយគ្នាមកនោះ តាមពិតក៏មានទំនាក់ទំនងជាមួយនឹងព្រះសង្ឃជាន់ខ្ពស់ជាច្រើនអង្គនៅវត្តល្បីៗផងដែរ។
ប៉ូលិសបានរកឃើញថា ស្ត្រីឈ្មោះ Golf គឺបានពាក់ព័ន្ធជាមួយព្រះសង្ឃជាន់ខ្ពស់យ៉ាងហោចណាស់ ១៥ អង្គ ដែលបានផ្ញើប្រាក់ឱ្យនាងចាយវាយក្នុងរយៈពេលប៉ុន្មានឆ្នាំមកនេះ។ នៅពេលផ្ទៀងផ្ទាត់ជាមួយនឹងភស្តុតាងជំនួយមួយចំនួនដូចជា រូបភាព វីដេអូ និង សារក្នុងឆាតឆ្លងឆ្លើយគ្នា ប៉ូលិសស៊ើបអង្កេតក៏កំណត់បានអត្តសញ្ញាណព្រះសង្ឃចំនួន ៨ អង្គហើយដែលមានទំនាក់ទំនងស្នេហាជាមួយស្ត្រីខាងលើនេះ។
គួរឱ្យដឹងថា រឿងអាស្រូវក្នុងវត្តនេះដែរបានបើកកកាយឡើងបន្ទាប់ពីកាលពីថ្ងៃទី ០៤ ខែកក្កដា ឆ្នាំ ២០២៥ កន្លងទៅ ប៉ូលិសប្រឆាំងអំពើពុករលួយនៅថៃ បានចុះឆែកឆេរផ្ទះរបស់នាង Golf ហើយរកឃើញរូបភាព និង វីដេអូឃ្លីបក្ដៅសាច់ប្រមាណជាង ៨ ម៉ឺនក្នុងទូរស័ព្ទដៃចំនួន ៥ គ្រឿងរបស់នាង។ លើសពីនេះទៅទៀត ប៉ូលិសក៏រកឃើញថានាងមានកូនចំនួន ៣ នាក់ (អាយុ ១៣,១០ និង ៦ ឆ្នាំ) ជាមួយនឹងអតីតព្រះសង្ឃជាន់ខ្ពស់ប៉ុន្មានអង្គផងដែរ។
ដំបូងឡើយ ក្រុមប៉ូលិសស៊ើបអង្កេតគឺទៅឆែកឆេររកភស្តុតាងពាក់ព័ន្ធនឹងករណីពុករលួយក្នុងវត្តនោះទេ ប៉ុន្តែបែរជារកឃើញភស្តុតាងលើសនេះទៅទៀត ដោយមានវីដេអូ និង រូបភាពក្ដៅសាច់រវាងនាង Golf និង ព្រះសង្ឃជាន់ខ្ពស់ជាច្រើនអង្គពីវត្តល្បីៗជាច្រើនក្នុងបណ្ដាខេត្តនានានៅប្រទេសថៃ។
តាមការបញ្ជាក់ពីស្នងការរងនៃការិយាល័យកណ្ដាលផ្នែកស៊ើបអង្កេត Pol Maj Gen Charoonkiat Pankaew បានឱ្យដឹងថា វត្តជាច្រើនបច្ចុប្បន្នកំពុងស្ថិតក្រោមការស៊ើបអង្កេតរបស់ប៉ូលិស ដោយក្នុងនោះរួមមានវត្តល្បីៗដូចជា វត្ត Tri Thotsathep នៅក្រុងបាងកក វត្ត Phra Phutthachai នៅក្រុង Saraburi វត្ត Sothonwararam នៅខេត្ត Chachoengsao វត្ត Phra Si Ratana Mahathat នៅក្រុង Phitsanulok និង វត្តផ្សេងៗទៀតនៅខេត្ត Phichit, Phetchabun, Samut Sakhon និង Khon Kaen៕
ប្រភព៖ Bangkok Post
