នៅព្រឹកថ្ងៃទី ២៥ ខែមេសា ឆ្នាំ ២០២៥ នេះ មានហេតុការណ៍អគ្គិភ័យមួយបានឆាបឆេះចេញពីភោជនីយដ្ឋានមួយកន្លែងក្នុងផ្សារទំនើបដ៏ល្បី COEX ស្ថិតនៅតំបន់ Samseong-dong សង្កាត់ Gangnam ក្រុងសេអ៊ូល ប្រទេសកូរ៉េខាងត្បូង បណ្ដាលឱ្យមានការជម្លៀសមនុស្សប្រមាណ ១២០០ នាក់ចេញភ្លាមៗ។ អគ្គិភ័យនោះដែរត្រូវគ្រប់គ្រងបានទាំងស្រុងក្នុងរយៈពេល ២ ម៉ោង ដោយគ្មាននរណាម្នាក់ប៉ះពាល់ដល់អាយុជីវិតនោះឡើយ។
តាមអាជ្ញាធរផ្នែកពន្លត់អគ្គិភ័យបានឱ្យដឹងថា ភ្លើងបានឆាបឆេះឡើងនៅវេលាម៉ោង ១១ និង ០៧ នាទីព្រឹក (ពេលវេលាក្នុងតំបន់) ដោយតាមសំឡេងអ្នកប្រកាសក្នុងផ្សារបានបញ្ជាក់ថា ភ្លើងបានឆេះចេញពីចង្ក្រានបាយនៃភោជនីយដ្ឋានមួយនៅជាន់ទី ២។ ក្រុមសង្គ្រោះបានចុះទៅដល់ទីតាំងភ្លាមៗនៅម៉ោង ១១ និង ១០ នាទៅ ដោយសរុបក្រុមពន្លត់ទាំងអស់មានចំនួន ១៤៧ នាក់ និង ប្រើប្រាស់ឡានទឹកចំនួន ៣៣ គ្រឿង។
តាមព័ត៌មានឱ្យដឹងទៀតថា ភ្លើងចាប់ផ្ដើមឆេះខ្លាំងក្លានៅវេលាម៉ោង ១១ និង ៤២ នាទី និង ត្រូវបានពន្លត់អស់ទាំងស្រុងនៅម៉ោង ១ និង ១៤ នាទីរសៀល។ គួរបញ្ជាក់ដែរថា អំឡុងពេលមានភ្លើងឆាបឆេះនោះ ផ្សារទំនើប COEX កំពុងតែធ្វើកម្មវិធីតាំងពិព័រណ៌អន្តរជាតិដ៏ធំ 2025 World IT Show (WIS) ដោយកម្មវិធីត្រូវផ្អាកបណ្ដោះអាសន្ននៅពេលនោះ តែត្រូវបានដំណើរវិញធម្មតាក្រោយភ្លើងត្រូវបានពន្លត់អស់៕
ប្រភព៖ Koreaboo
