នារីម្នាក់ ត្រូវគេចា- /ក់ ២០ ដង តែសំណាងរួចផុតជីវិត ព្រោះបានគុណបុណ្យស៊ីលីកូននៅដើមទ្រូងជួយ

ថ្មីៗនេះ មានករណីវាយប្រហារដ៏តក់ស្លុតមួយបានកើតឡើងក្នុងក្រុង Hangzhou ខេត្ត Zhejiang ប្រទេសចិន ដោយនារីវ័យក្មេងម្នាក់ត្រូវបានជនមិនស្គាល់មុខចាក់ដើមទ្រូងរហូតដល់ ២០ កាំបិត ក្រោយរូបគេចាប់នាងធ្វើចំណាប់ខ្មាំងនាកន្លែងចតរថយន្តក្នុងផ្សារទំនើបមួយកន្លែង។

យ៉ាងណាមិញ បានគុណបុណ្យស៊ីលីកូនដើមទ្រូងដែលនាងធ្វើជួយ ជនរងគ្រោះបានរួចផុតជីវិត ដោយការចាក់ទាំងប៉ុន្មានគឺទើរជាប់ត្រឹមស៊ីលីកូន មានតែមួយកាំបិតប៉ុណ្ណោះប៉ះដល់សួតរបស់នាង តែមិនធ្ងន់ធ្ងរដល់អាយុជីវិតឡើយ។

តាមសារព័ត៌មាន ET Today បានឱ្យដឹងថា ករណីខាងលើបានកើតឡើងកាលពីថ្ងៃទី ២២ ខែឧសភា ឆ្នាំ ២០២៥ កន្លងទៅ វេលាម៉ោងប្រមាណ ៥ និង ៤០ នាទីល្ងាច (ពេលវេលាក្នុងតំបន់)។ ជនរងគ្រោះ មានត្រកូល Ma ភ្លាមៗស្រាប់តែត្រូវបុរសម្នាក់ចាប់ធ្វើចំណាប់ខ្មាំងទាំងដៃរបស់គេមានកាន់កាំបិតមួយ។

ជនបង្កបានបង្ខំនាងឱ្យចេញថ្លៃផ្ញើឡាន រួចឱ្យនាងចាកចេញពីផ្សារជាមួយគេទាំងដែលដៃកាន់កាំបិតគំរាម។ យ៉ាងណាមិញ ខណៈជនបង្កភ្លេចខ្លួនមួយភ្លែត នាងក៏ឆ្លៀតផ្ញើទីតាំងទៅមិត្តប្រុសឱ្យមកជួយ។ មិត្តប្រុសរបស់នាងបានតាមដានទីតាំង ហើយក៏បានទាក់ទងទៅប៉ូលិសឱ្យជួយអន្តរាគមន៍។

ទទួលបានព័ត៌មានភ្លាមប៉ូលិសក៏ចុះទៅទីតាំងដែលផ្ដល់ឱ្យ តែពេលទៅដល់ ជនបង្កក៏ផ្ទុះកំហឹងងាកទៅចាក់ជនរងគ្រោះជាច្រើនកាំបិតត្រង់ដើមទ្រូង។ ជនរងគ្រោះបានយកដៃរងការវាយប្រហារផងដែរ ហើយចុងក្រោយនាងក៏អាចទាញបើកទ្វារឡានបាន ប៉ុន្តែត្រូវបានដួលសន្លប់ទាំងនៅក្នុងឡាន។ ចំណែកជនបង្កវិញ ក្រោយវាយប្រហារជនរងគ្រោះរួច រូបគេក៏បានសម្លាប់ខ្លួនតាមក្រោយ៕

ប្រភព៖ World Of Buzz