នាយករដ្ឋមន្ត្រីថៃ ជំរុញពលរដ្ឋឱ្យស្លៀកខោរូបដំរីអបអរថ្ងៃបុណ្យសង្ក្រាន្ត ដើម្បីជួយផ្សព្វផ្សាយវប្បធម៌របស់ប្រទេស

នាយករដ្ឋមន្ត្រីប្រទេសថៃ Paetongtarn Shinawatra កាលពីថ្ងៃទី ១៩ ខែមីនា ឆ្នាំ ២០២៥ កន្លងទៅ បានធ្វើការជំរុញឱ្យពលរដ្ឋថៃនាំគ្នាស្លៀកខោរូបដំរីដែលមានក្រឡាក្បាច់តំណាងឱ្យខេត្តរបស់ពួកគេដើម្បីជាការអបអរថ្ងៃបុណ្យសង្ក្រាន្ត។

ការប្រកាសជំរុញពលរដ្ឋនេះដែរ លោកស្រីនាយករដ្ឋមន្ត្រីបានធ្វើឡើងមុនពេលដឹកនាំកិច្ចប្រជុំលើកដំបូងនៃគណៈកម្មាធិការយុទ្ធសាស្ត្រអំណាចទន់ជាតិនៅអគាររដ្ឋាភិបាល។ លោកស្រីខ្លួនឯងផ្ទាល់បានស្លៀកខោរូបដំរីពណ៌ផ្ទៃមេឃរបស់ខេត្ត Kanchanaburi ដោយលោកស្រីបាននិយាយថា លោកស្រីទទួលបានខោរូបដំរីជាង ៥០ ខោមកពីខេត្តផ្សេងៗគ្នា ប៉ុន្តែលោកស្រីជ្រើសរើសស្លៀកខោមកពីខេត្ត Kanchanaburi ព្រោះតែវាមានពណ៌ផ្ទៃមេឃស្ដើងស៊ីគ្នានឹងអាវធំពណ៌គ្រីមដែលលោកស្រីពាក់។

លោកស្រី Paetongtarn ក៏បានលើកទឹកចិត្តដល់អ្នកចូលរួមកិច្ចប្រជុំទាំងអស់ឱ្យស្លៀកខោរូបដំរីដើម្បីជាការបង្ហាញពីអំណាចទន់នៃខេត្តរបស់ពួកគេ។ លោកស្រីសង្កត់បញ្ជាក់ថា ខោរូបដំរីដំណាងខេត្តមួយៗគឺមានក្រឡាក្បាច់ប្លែកៗរៀងៗខ្លួនដែលបង្ហាញពីអត្តសញ្ញាណវប្បធម៌របស់ពួកគេ។

គួរឱ្យដឹងថា ខោរូបដំរីដើមឡើយត្រូវគស្គាល់ថាជាខោរបស់អ្នកនេសាទ ដោយច្នៃចេញមកមានជើងធំៗរលុងៗស្រួលស្លៀក។ ខោរលុងៗប្រភេទនេះបានក្លាយជាខោដ៏ពេញនិយមដំបូងបំផុតនៅខេត្ត Chiang Mai ដោយអមដោយរូបដំរីនៅលើខោទាំងនោះ។ ក្រោយមក ខោប្រភេទនេះក៏កាន់តែពេញនិយមខ្លាំងទៅៗ ជាពិសេសភ្ញៀវទេសចរតែម្ដងរហូតខោរបស់អ្នកនេសាទនេះត្រូវបានផ្ទុះល្បីហៅថា «ខោរូបដំរី» មកដល់សព្វថ្ងៃនេះ។

លោកស្រីនាយករដ្ឋមន្ត្រីថៃ បានសម្ដែងក្ដីសង្ឃឹមថាប្រជាជនថៃនឹងនាំគ្នាស្លៀកខោដំរីអំឡុងពេលបុណ្យសង្ក្រាន និង នាំគ្នាធ្វើការផ្សព្វផ្សាយខោតំណាងឱ្យខេត្តរបស់ពួកគេនៅតាមបណ្ដាញសង្គមផងដែរ៕

ប្រភព៖ The Nation