នាយកដ្ឋានឧតុនិយមប្រចាំប្រទេសថៃ នៅថ្ងៃទី ៣០ ខែមិថុនា ឆ្នាំ ២០២៥ នេះ បានព្យាករណ៍ថា ព្យុះភ្លៀងផ្គររន្ទះ និង ខ្យល់បោកបក់ខ្លាំងនឹងកើតមានឡើងគ្របដណ្ដប់ពាសពេញក្រុងបាងកក និង បណ្ដាខេត្តនៅជុំវិញនោះ ដោយភ្លៀងធ្លាក់ខ្លាំងរំពឹងនឹងកើតមាន ៧០% លើតំបន់ទាំងនោះ។
នៅរយៈពេល ២៤ ម៉ោងទៀត ភ្លៀងធ្លាក់ខ្លាំងរំពឹងនឹងកើតមាននៅផ្នែកមួយចំនួននៃតំបន់ភាគខាងជើង ភាគខាងលើតំបន់ភូមិភាគឦសាន ភាគខាងលិចតំបន់ខ្ពង់រាបកណ្ដាល និង ភាគខាងកើត។ ពលរដ្ឋដែលរស់នៅតាមតំបន់ទាំងនោះត្រូវបានណែនាំឱ្យប្រុងប្រយ័ត្នពីជំនន់ទឹកភ្លៀង។ អាកាសធាតុសើមបានជំរុញដោយខ្យល់មូសុងនិរតីកម្រិតមធ្យមលើសមុទ្រ Andaman និង ឈូងសមុទ្រថៃ រួមជាមួយនឹងតំបន់សម្ពាធទាបលើភាគខាងជើងប្រទេសវៀតណាម។
ជាមួយគ្នានោះដែរ រលកជាមធ្យមក៏រំពឹងថានឹងកើតមានឡើងទាំងនៅតាមសមុទ្រ Andaman និង ឈូងសមុទ្រថៃ ដោយនៅផ្នែកខាងលើសមុទ្រ Andaman រលកសមុទ្រអាចមានកម្ពស់ដល់ ២ ម៉ែត្រ ខណៈសមុទ្រនៅផ្នែកខាងក្រោមសមុទ្រ Andaman និង ផ្នែកខាងលើឈូងសមុទ្រថៃ អាចមានរលកកម្ពស់ពី ១-២ ម៉ែត្រ។ ចំណែកតំបន់ដែលមានព្យុះផ្គររន្ទះ អាចមានរលកកម្ពស់ដល់ ២ ម៉ែត្រផងដែរ ដោយអ្នកនេសាទទាំងអស់ត្រូវបានជំរុញឱ្យចេញទូកដោយការប្រុងប្រយ័ត្ន និង ចៀសវាងចេញទូកនៅតំបន់ដែលមានព្យុះវាយប្រហារ៕
ប្រភព៖ The Nation
