ថ្មីៗនេះ វីដេអូថតជាប់ដោយកាមេរ៉ាក្នុងឡានអ្នកដំណើរមួយកំពុងផ្ទុះការចាប់អារម្មណ៍យ៉ាងខ្លាំងពីសំណាក់អ្នកលេងតាមបណ្ដាញសង្គមហ្វេសប៊ុកនៅប្រទេសម៉ាឡេស៊ី ដោយវីដេអូនោះបង្ហាញឱ្យឃើញបុរស ២ នាក់ វារចេញពីបង្អួចឡានឡើងផ្លោះលើដំបូលផ្លាស់ប្ដូរគ្នាម្នាក់ម្ដងដើម្បីដូរដៃគ្នាបើកឡាន ទាំងដែលឡានកំពុងតែបើកនៅតាមផ្លូវ។
ហេតុការណ៍ខាងលើនេះ បានកើតឡើងកាលពីថ្ងៃទី ១៤ ខែឧសភា ឆ្នាំ ២០២៥ កន្លងទៅ វេលាម៉ោងប្រមាណ ៦ និង ៤៣ នាទីល្ងាច (ពេលវេលាក្នុងតំបន់) ដោយគេជឿថាទីតាំងស្ថិតលើដងផ្លូវ Putrajaya Expressway។
តាមការថតជាប់ពីកាមេរ៉ាឡានអ្នកដំណើរ នៅពេលនោះផ្លូវកំពុងស្ទះ ហើយឡានអត់អាចបើកលឿនបានឡើយ។ ភ្លាមៗក៏ស្រាប់តែឃើញបុរសពាក់អាវសម្នាក់ បានវារចេញពីបង្អួចកន្លែងអ្នកបើកឡាន ដោយទំនងមានបំណងចង់ដូរដៃអ្នកបើក។ មួយសន្ទុះក្រោយមក ក៏មានបុរសម្នាក់ទៀតពាក់អាវខ្មៅ វារចេញពីបង្អួចធ្វើសកម្មភាពដូចគ្នានឹងបុរសអាវសដែរ។
សកម្មភាពរបស់បុរសទាំងពីរនាក់នេះដែរ បានធ្វើឱ្យមហាជនតាមបណ្ដាញសង្គមជាច្រើននាំគ្នាផ្ទុះប្រតិកម្ម ដោយខ្លះលើកឡើងថា សង្ស័យបុរស ២ នាក់នោះថត content ដាក់ TikTok ខណៈម្នាក់ទៀតដាក់ធ្ងន់ៗ ស្នើប៉ូលិសឱ្យចាប់ខ្លួន ២ នាក់នោះយកទៅអប់រំ ព្រោះទង្វើនោះមិនត្រឹមតែបង្កគ្រោះថ្នាក់ដល់ខ្លួនឯង តែក៏ប៉ះពាល់ដល់អ្នកដទៃផងដែរ៕
