កាលពីថ្ងៃទី ២៣ ខែឧសភា ឆ្នាំ ២០២៥ កន្លងទៅ កាសែតនៅចិនបានចេញផ្សាយព័ត៌មានដ៏រសើបមួយពាក់ព័ន្ធនឹងចចាមអារ៉ាមលេចឮថា តារាសម្ដែងប្រុស Roger Kwok អាយុ ៦០ ឆ្នាំ និង បវរកញ្ញាហុងកុង ឆ្នាំ ២០២៣ នាង Hilary Chong អាយុ ២៣ ឆ្នាំ កំពុងតែមានទំនាក់ទំនងស្នេហាគ្នា។
តាមព័ត៌មានបានឱ្យដឹងថា តារាមួយគូនេះបានធ្វើឱ្យគេចាប់បានភស្តុតាងជាច្រើនដែលបង្ហាញថាទំនាក់ទំនងរបស់ពួកគេទាំងពីរគឺលើសពីមិត្តរួមការងារជាមួយគ្នា។ ជាក់ស្ដែង លោក Roger Kwok និង នាង Hilary Chong បានស្គាល់គ្នាដំបូងពេលដែលពួកគេបានសម្ដែងរឿងជាមួយគ្នាក្នុងតួអង្គជាឪពុក និង កូនស្រី។ ក្រោយបញ្ចប់ការថត ពួកគេក៏ឧស្សាហ៍ឃើញទៅលេង tennis ជាមួយគ្នា។ មិនត្រឹមតែប៉ុណ្ណេះ កាលពីខែមេសា ឆ្នាំ ២០២៥ កន្លងទៅ លោក Roger Kwok ថែមទាំងបានរៀបចំធ្វើពិធីខួបកំណើត surprise បវរកញ្ញាហុងកងខាងលើដោយផ្ទាល់ទៀតផង។
ក្រោយចចាមអារ៉ាមនេះលេចឮឡើង មហាជននៅតាមបណ្ដាញសង្គមជាច្រើនបានបញ្ចេញមតិរិះគន់យ៉ាងចាស់ដៃជុំវិញគម្លាតអាយុខុសគ្នាខ្លាំងរវាងតារាទាំង ២ រូបនេះ។ យ៉ាងណាមិញ ជុំវិញចចាមអារ៉ាមនេះ ខាងបវរកញ្ញាហុងកុង ២០២៣ ក៏បានចេញមុខមកបដិសេធដែរថា នាង និង Roger Kwok គឺត្រឹមជាមិត្តរួមការងារជិតស្និទ្ធនឹងគ្នាប៉ុណ្ណោះ។
ដោយឡែក ពេលដែលសួរនាងជុំវិញរឿងមានស្នេហាជាមួយមនុស្សចាស់ជាងខ្លួន នាងក៏បានតបវិញដែរថា៖ <<ខ្ញុំមិនមានកំណត់អាយុអ្វីឡើយពេលគិតដល់រឿងស្នេហា។ ស្នេហាគឺមិនបែងចែកសញ្ជាតិ អាយុ ឬភេទឡើយ ដូច្នេះខ្ញុំគឺគ្មានបញ្ហាឡើយក្នុងការស្រឡាញ់អ្នកដែលមានអាយុបង ឬក្មេងជាងខ្ញុំ>>។
ងាកមកតារាសម្ដែងប្រុស Roger Kwok វិញ គឺនៅតែរក្សាភាពស្ងៀមស្ងាត់ មិនទាន់ចេញមុខមកបកស្រាយជុំវិញចចាមអារ៉ាមស្នេហានេះនោះទេ៕
