នៅទីបំផុត តារាសម្ដែងស្រីហុងកុង Myolie Wu បានចេញមុខឆ្លើយតបបញ្ជាក់ច្បាស់ៗហើយជុំវិញការបែកធ្លាយរូបថតប្ដីរបស់នាងឈរឱបថើបស្រីក្នុងក្លឹបកម្សាន្ត ដោយរូបនាងនិយាយថាគ្រប់យ៉ាងគ្រាន់ជាការយល់ច្រឡំ ហើយចំណងស្នេហ៍នាង និង ស្វាមីនៅតែមានក្ដីសុខដូចដើម។
កាលពីយប់ថ្ងៃទី ០៧ ខែឧសភា ឆ្នាំ ២០២៥ កន្លងទៅ នៅក្នុងកម្មវិធីមួយនាក្រុងម៉ាកាវ តារាស្រី Myolie Wu បានចេញមកធ្វើការបកស្រាយពាក់ព័ន្ធនឹងចចាមអារ៉ាមថាស្វាមីរបស់នាង Philip Lee លួចផិតក្បត់នាង ក្រោយឃើញឱបថើបស្រីជាច្រើនក្នុងក្លឹបយ៉ាងរីករាយកាលពីខែមីនា ឆ្នាំ ២០២៥ កន្លងទៅ។ Myolie បាននិយាយថា ប្ដីរបស់នាងបានទៅឆែកមើលកាមេរ៉ាសុវត្ថិភាពនៅអំឡុងពេលធ្វើពិធីជប់លៀងនោះ ហើយក៏រកឃើញថាមានបុរសម្នាក់បានលួចថតសកម្មភាពរបស់លោក។
តាមការបញ្ជាក់ពី Myolie Wu និង ស្វាមីរបស់នាង បុរសខាងលើគឺទទួលសំណើរពីគេឱ្យថតវីដេអូ និង រូបភាពរបស់ Philip។ Philip ខ្លួនឯងផ្ទាល់ក៏បានដឹងថាមានអ្នកលួចថតដែរ ប៉ុន្តែដោយសារលោកគិតថាលោកមិនបានធ្វើអ្វីខុសផងទើបបានជាមិនខ្វល់ខ្វាយច្រើន ហើយលោកក៏មានការភ្ញាក់ផ្អើលណាស់ដែរ ដោយរឿងមួយនេះទៅជាវែងឆ្ងាយបែបនេះ។
Myolie Wu បាននិយាយទៀតថា៖ «ខ្ញុំគិតថាគាត់មិនងាយទៅកន្លែងឯកជនបែបនោះទេ។ ខ្ញុំជាប្រពន្ធគាត់ អ៊ីចឹងគ្រប់យ៉ាងដែលប្ដីខ្ញុំធ្វើរឿងអីខ្ញុំមិនដឹង។ នៅថ្ងៃនោះ គាត់គ្រាន់តែចាយពេលសប្បាយធម្មតាប៉ុណ្ណោះ»។ បើតាម Myolie និយាយ មនុស្សនៅកម្មវិធីជប់លៀងពេលនោះគឺសុទ្ធតែជាមិត្តភក្តិយូរអង្វែងរបស់ប្ដីនាង ដោយមនុស្សស្រី ២ នាក់ដែល Philip Lee ឱបថើបនោះក៏ស្គាល់នាងដូចគ្នា ហើយស្វាមីរបស់ពួកគេក៏នៅក្នុងកម្មវិធីនោះដែរ។ នាង និង ប្ដីរបស់នាងគឺនៅតែមានចំណងស្នេហ៍រឹងមាំដដែល ហើយនាងក៏ទុកចិត្តប្ដីរបស់នាងដែរ៕
