ថ្មីៗនេះ វីដេអូមួយបង្ហោះលើបណ្ដាញសង្គមកំពុងធ្វើឱ្យមនុស្សជាច្រើនមានការភ្ញាក់ផ្អើលជាខ្លាំង ដោយវីដេអូនោះដែរបង្ហាញឱ្យឃើញក្មេងៗមួយក្រុមនៅរដ្ឋ Queensland ប្រទេសអូស្ត្រាលី កំពុងនាំគ្នាលេងលោតអន្ទាក់យ៉ាងសប្បាយរីករាយ។ យ៉ាងណាមិញ ពេលមើលឱ្យកៀកទៅទើបដឹងច្បាស់ថាខ្សែដែលក្មេងៗយកមកលោតអន្ទាក់លេងនោះ តាមពិតទៅគឺជាសត្វពស់ថ្លាន់ដ៏ធំវែងមួយក្បាល។
តាមឱ្យដឹង ពស់ថ្លាន់មួយក្បាលនោះមានប្រវែងប្រមាណ ២.៥ ម៉ែត្រ ដោយពេលនោះមានស្ត្រីម្នាក់បានទៅសួរថា នោះគឺជាអ្វី? ដោយក្មេងម្នាក់ក្នុងចំណោមនោះក៏បានឆ្លើយតបថា៖ «វាជាពស់ថ្លាន់ក្បាលខ្មៅ (black-headed python)»។ វីដេអូនោះដែរបានទាក់ទាញមនុស្សឱ្យចុចចូលមើលរាប់ម៉ឺនដងរហូតបែកធ្លាយដឹងទៅដល់ខាងក្រសួងបរិស្ថាន។
អ្នកនាំពាក្យក្រសួងបរិស្ថាន ទេសចរណ៍ វិទ្យាសាស្ត្រ និង នវានុវត្តន៍ (DSTI) ក៏បានចេញមកបញ្ជាក់ដែរថា ពួកគេកំពុងតែបើកការស៊ើបអង្កេតលើករណីមួយនេះផងដែរ។ តាមការរៀបរាប់ អ្នកនាំពាក្យរូបនោះបានឱ្យដឹងថា៖ «ពួកយើងបានប្រាប់ដល់ពលរដ្ឋ Queensland ទាំងអស់ឱ្យមានការគោរពស្រឡាញ់សត្វ បើទោះជាពួកវានៅរស់ឬក៏ងាប់ក៏ដោយ។ ពួកយើងនឹងធ្វើការថ្កោលទោសចំពោះទង្វើមិនសមរម្យទាំងនេះ ហើយពួកយើងនឹងស៊ើបអង្កត។ អ្នកដែលបានសម្លាប់ ឬធ្វើឱ្យពស់ថ្លាន់ក្បាលខ្មៅរងរបួស ប្រឈមនឹងទទួលពិន័យជាសាច់ប្រាក់ដល់ ១២៦១៥ ដុល្លារ»។
គួរបញ្ជាក់ផងដែរថា ពស់ថ្លាន់ក្បាលខ្មៅគឺជាពស់មួយប្រភេទមិនមានពិសនោះឡើយ ពួកវាសម្លាប់សត្វជាចំណីដោយការរុំរឹតខ្លួន៕ ទស្សនាវីដេអូនៅទីនេះ
