កាលពីថ្ងៃទី ២២ ខែមករា ឆ្នាំ ២០២៥ កន្លងទៅ មានហេតុការណ៍ភ្លើងឆេះព្រៃថ្មីមួយទៀតហើយហៅថា Hughes Fire បានឆាបឆេះឡើងនៅក្បែរក្រុង Castaic ប្រមាណជាង ៨០ គីឡូម៉ែត្រភាគខាងជើងក្រុង Los Angeles សហរដ្ឋអាមេរិក។ ជាមួយកម្លាំងខ្យល់បោកបក់ខ្លាំង បូករួមនឹងអាកាសធាតុក្ដៅស្ងូតផងនោះ ភ្លើងឆេះព្រៃថ្មីនេះដែរបានរីករាលដាលរហ័សខ្លាំងដោយឆាបឆេះផ្ទៃដីជាង ៣១ គីឡូម៉ែត្រការ៉េក្នុងរយៈពេលត្រឹមប៉ុន្មានម៉ោងប៉ុណ្ណោះ។ តាមការប៉ាន់ប្រមាណ រាល់ ២ ទៅ ៣ វិនាទី ភ្លើងអាចឆាបឆេះតំហំក្នុងទំហំប៉ុនតារាងបាល់ទាត់ឯណោះ។
ភ្លើងឆេះព្រៃ Hughes Fire បច្ចុប្បន្នគឺមានទំហំពាក់កណ្ដាលទៅនឹងភ្លើងឆេះព្រៃ Eaton Fire ដែលជាភ្លើងឆេះព្រៃមួយក្នុងចំណោមភ្លើងឆេះព្រៃទ្រង់ទ្រាយធំចំនួន ២ ដែលបានលេបត្របាក់តំបន់នៅក្រុង Los Angeles ក្នុងពេលប៉ុន្មានសប្ដាហ៍កន្លងមកនេះ។ ក្នុងហេតុការណ៍ភ្លើងឆេះព្រៃនេះដែរ ពលរដ្ឋប្រមាណជា ៣១ ០០០ នាក់នៅក្រុង Castaic ត្រូវបានជម្លៀសចេញជាបន្ទាន់ ខណៈមនុស្សប្រមាណជា ២៣ ០០០ នាក់ផ្សេងទៀតកំពុងស្ថិតក្រោមការប្រកាសអាសន្នឱ្យត្រៀមធ្វើការជម្លៀសខ្លួន។
តាមការបញ្ជាក់ពីនាយកដ្ឋានការពារព្រៃឈើ និង អគ្គិភ័យប្រចាំរដ្ឋ California (Cal Fire) បានលើកឡើងដែរថា ក្រុមពន្លត់អគ្គិភ័យប្រមាណ ៤ ពាន់នាក់ត្រូវបានបញ្ជូនទៅពាសពេញតំបន់ Southern California ដើម្បីប្រយុទ្ធជាមួយនឹងភ្លើងឆេះព្រៃដ៏ខ្លាំងក្លានេះ។ បន្ថែមពីនេះ ខាងយន្តហោះពន្លត់ប្រមាណ ១០ គ្រឿងក៏ត្រូវបានបញ្ជូនទៅផងដែរ។
គួរបញ្ជាក់ដែរថា តំបន់ Southern California មិនមានភ្លៀងធ្លាក់ខ្លាំងក្នុងរយៈពេល ៩ ខែមកហើយ ដែលជាហេតុនាំឱ្យតំបន់នេះប្រឈមនឹងស្ថានភាពភ្លើងឆេះទ្រង់ទ្រាយធំបែបនេះ។ យ៉ាងណាមិញ តាមការព្យាករណ៍អាកាសធាតុបានឱ្យដឹងថាតំបន់នេះអាចមានភ្លៀងធ្លាក់ចន្លោះចាប់ពីថ្ងៃទី ២៥ ដល់ថ្ងៃទី ២៧ ខែមករា ឆ្នាំ ២០២៥ ខាងមុខនេះ៕
