បើនិយាយពីចំណងស្នេហ៍រវាងអតីតសមាជិកក្រុមចម្រៀងប្រុស EXO តារាចម្រៀង Tao និង អតីត trainee របស់ផលិតកម្ម SM និង ជាតារាសម្ដែងស្រី Xu Yiyang ឃើញថាតាំងពីប្រកាសពីទំនាក់ទំនងជាផ្លូវការមក ពួកគេទាំងពីរតែងតែបង្ហាញសកម្មភាពផ្អែមល្ហែមជាមួយគ្នា បង្ហាញក្ដីស្រឡាញ់ចំពោះគ្នាខ្លាំងរហូតសឹងបែកពីគ្នាមួយជំហានមិនបាន។
យ៉ាងណាមិញ ក្រោយប្រកាសភ្ជាប់ពាក្យជាមួយគ្នាមិនបានប៉ុន្មាន មកដល់ថ្ងៃទី ០២ ខែធ្នូ ឆ្នាំ ២០២៤ នេះ តារាប្រុស Tao បានចេញមកប្រកាសពីដំណឹងដ៏រីករាយដោយទម្លាយរូបភាពមួយចំនួនបង្ហាញឱ្យឃើញថា លោក និង Xu Yiyang បានក្លាយជាប្ដីប្រពន្ធនឹងគ្នាដោយស្របច្បាប់ហើយ។
តាមរយៈរូបភាពដែលបានបង្ហោះ គឺជារូបភាព Tao និង ភរិយាថ្មីថ្មោងឈរកាន់សំបុត្រអាពាហ៍ពិពាហ៍។ ក្រោយរូបភាពទាំងនោះបានបង្ហោះឡើង ក៏មានអ្នកគាំទ្ររបស់ពួកគេជាច្រើននាំគ្នាបញ្ចេញមតិអបអរចំពោះប្ដីប្រពន្ធតារាមួយគូនេះព្រោងព្រាត៕
