កាលពីថ្ងៃទី ១៥ ខែកក្កដា ឆ្នាំ ២០២៥ កន្លងទៅ ប៉ូលិសក្នុងប្រទេសថៃ បានចេញដីកាចាប់ខ្លួនស្ត្រីម្នាក់ឈ្មោះ Wilawan Emsawat ហៅ Golf ពាក់ព័ន្ធនឹងរឿងអាស្រូវប្រព្រឹត្តទង្វើមិនសមរម្យជាមួយព្រះសង្ឃជាច្រើនអង្គ ករណីលាងលុយកខ្វក់ និង ទទួលទ្រព្យសម្បត្តិដែលលួចគេ។
នាង Golf ត្រូវប៉ូលិសចាប់ខ្លួននៅផ្ទះរបស់នាងផ្ទាល់នាតំបន់មួយក្នុងខេត្ត Nonthaburi ក្រោយប៉ូលិសរកឃើញភស្តុតាងលុយចំនួន ៣៨ ម៉ឺនបាត (ប្រមាណ ១១៦៩៦ ដុល្លារ) វេរទៅឱ្យនាងតាមគណនីធនាគាររបស់វត្តដោយព្រះសង្ឃមួយអង្គ។ តាមការចេញផ្សាយរបស់ Bangkok Post លុយទាំងនោះគឺវេរចេញដោយអតីតព្រះសង្ឃមួយអង្គឈ្មោះ Phra Theppatcharaporn ដែលត្រូវចាប់ផ្សឹកកាលពីថ្ងៃទី ១៤ ខែកក្កដា ឆ្នាំ ២០២៥ កន្លងទៅ ដោយសារភាពថាពិតជាបានឱ្យលុយទៅស្ត្រីឈ្មោះ Golf ពិតមែន តែបដិសេធថាមិនមានទំនាក់ទំនងស៊ីជម្រៅជាមួយគ្នាឡើយ។
លោក Phra Theppatcharaporn អាយុ ៦៧ ឆ្នាំ អតីតព្រះសង្ឃជាន់ខ្ពស់នៅវត្ត Chujit Dhammaram នៅខេត្ត Ayutthaya បាននិយាយថា លោកបានវេរលុយចំនួន ៣៨ ម៉ឺនបាតពីគណនីធនាគាររបស់វត្តក៏ដូចជា ១២.៨ លានបាតពីគណនីផ្ទាល់ខ្លួន (រួមទាំងលុយបច្ច័យវត្ត) ទៅឱ្យស្ត្រីខាងលើ៕
