ថ្មីៗកន្លងទៅនេះ ការិយាល័យស៊ើបអង្កេតហេតុការណ៍គ្រោះថ្នាក់លើអាកាសប្រចាំប្រទេសឥណ្ឌា បានចេញលទ្ធផលបឋមលើមូលហេតុដែលបណ្ដាលឱ្យយន្តហោះ Air India Boeing 787 ដឹកមនុស្សសរុប ២៤២ នាក់ បានធ្លាក់ផ្ទុះឆេះភ្លាមៗរហូតមនុស្សទាំងលើយន្តហោះ និង នៅលើដីត្រូវបាត់បង់ជីវិតរហូតដល់ ២៦០ នាក់។
តាមលទ្ធផលបានបង្ហាញឱ្យឃើញថា កុងតាក់បញ្ជូនប្រេងទៅម៉ាស៊ីនទាំង ២ គឺត្រូវបានចុចពី «បើក» ទៅ «បិទ» ត្រឹមមួយវិនាទីពីគ្នា មុនពេលយន្តហោះថយល្បឿន។ តាមរបាយការណ៍ គេបានឮសំឡេងអ្នកបើកយន្តហោះនិយាយគ្នា ដោយអ្នកបើកម្នាក់បានសួរទៅអ្នកបើកម្នាក់ទៀតថា ហេតុអីបានជាកុងតាក់បញ្ជូនប្រេងត្រូវកាត់ផ្ដាច់? ហើយអ្នកបើកម្នាក់ទៀតនោះក៏បានតបវិញថា លោកមិនបានដឹងនោះទេ។ បន្តិចក្រោយមក យន្តហោះក៏បានធ្លាក់ដាំក្បាលចុះរហូតផ្ទុះស្លាប់មនុស្ស ២៦០ នាក់។
គួរបញ្ជាក់ដែរថា នេះគឺជាលទ្ធផលស៊ើបអង្កេតទទួលបានបឋម ចំពោះមូលហេតុផ្លូវការនៃការធ្លាក់យន្តហោះ Air India នេះ ខាងភ្នាក់ងារស៊ើបអង្កេតនឹងបន្តស៊ើបបន្ថែម ហើយក៏ស្នើឱ្យភាគីដែលពាក់ព័ន្ធផ្ដល់ព័ត៌មាន និង ភស្តុតាងដែលមានបន្ថែមផងដែរ៕
