ស្របពេលរឿងរ៉ាវនៃការលាឈប់ពីការងារជាអ្នកថែទាំសត្វនៅភ្នំតាម៉ៅរបស់លោក ទ្រី ស៊ីថេង កំពុងតែក្ដៅគគុកពាសពេញបណ្ដាញសង្គម និង មហាជនជាច្រើនទាមទារឱ្យមានការបកស្រាយណាមួយពីខាងអង្គការដែលពាក់ព័ន្ធ ស្រាប់តែនៅថ្ងៃទី ០២ ខែកក្កដា ឆ្នាំ ២០២៥ នេះ ខាងអង្គការសម្ព័ន្ធមិត្តសត្វព្រៃ បានធ្វើការចេញសេចក្ដីថ្លែងការណ៍បន្ទាន់មួយ បកស្រាយជុំវិញបញ្ហាដ៏ក្ដៅមួយនេះ។
តាមរយៈសេចក្ដីថ្លែងការណ៍ដែលបានបង្ហោះលើគណនីហ្វេសប៊ុករបស់ខាងអង្គការដោយផ្ទាល់បានសរសេររៀបរាប់ថា៖ «សន្និសីទសារព័ត៌មាន – សម្រាប់ការចេញផ្សាយបន្ទាន់
សេចក្តីថ្លែងការណ៍ជុំវិញការលាឈប់ពីការងាររបស់លោក ទ្រី ស៊ីថេង និងការមើលថែទាំសត្វនៅភ្នំតាម៉ៅ។
អង្គការសម្ព័ន្ធមិត្តសត្វព្រៃសូមបញ្ជាក់ថា លោក ទ្រី ស៊ីថេង បានដាក់លិខិតលាលែងពីការងារដោយស្ម័គ្រចិត្តខ្លួនឯង ដោយលាឈប់ពីការងារចាប់ពីថ្ងៃទី ៣០ ខែមិថុនា ឆ្នាំ២០២៥ តទៅ។ គាត់មិនត្រូវបានគេបញ្ឈប់ ឬក៏ស្នើសុំឱ្យលាលែងពីការងារនោះឡើយ។
នៅភ្នំតាម៉ៅ ការផ្តល់ចំណី និងការថែទាំសត្វ មិនថាសត្វដំរី ឬសត្វផ្សេងៗទៀតនោះទេ គឺនៅតែបន្តផ្តល់ និងថែទាំជាប្រចាំតាមធម្មតា។
បច្ចុប្បន្ននេះ អង្គការសម្ព័ន្ធមិត្តសត្វព្រៃចំណាយប្រាក់ជាង ១,៥០០០ ដុល្លាសហរដ្ឋអាមេរិកក្នុងមួយខែសម្រាប់តែចំណីសត្វប៉ុណ្ណោះនៅភ្នំតាម៉ៅ ។
អង្គការសម្ព័ន្ធមិត្តសត្វព្រៃប្តេជ្ញាចិត្តរក្សាសុខុមាលភាពរបស់សត្វដំរីទាំងអស់ដែលកំពុងរស់នៅភ្នំតាម៉ៅ ដោយធ្វើការសហការជាដៃគូជាមួយក្រសួងកសិកម្ម រុក្ខាប្រមាញ់ និងនេសាទ»៕
