ជាដំណឹងដ៏រំភើប និង ភ្ញាក់ផ្អើលសម្រាប់អ្នកគាំទ្រវិស័យបាល់ទាត់ ដោយថ្មីៗនេះ កំពូលកីឡាករ Cristiano Ronaldo បានកាន់ចិញ្ចៀនបំពាក់លើដៃមិត្តស្រី ៨ ឆ្នាំ Georgina Rodriguez ហើយ។
ដំណឹងរីករាយនេះដែរ ត្រូវបានប្រកាសដោយ Georgina ផ្ទាល់លើបណ្ដាញសង្គម Instagram របស់នាង ជាមួយរូបភាពដៃពាក់ចិញ្ចៀនពេជ្រគ្រាប់ដ៏ធំប៉ុនគ្រាប់ខ្នុរ អមជាមួយសារសរសេរជាភាសាអេស្ប៉ាញដែលមានន័យថា៖ «ចា៎ ខ្ញុំយល់ព្រម ក្នុងជីវិតនេះ និង ក្នុងជីវិតណាៗរបស់ខ្ញុំទាំងអស់»។
គួររំឭកថា កំពូលកីឡាករបាល់ទាត់ Cristiano Ronaldo និង Georgina Rodriguez បានប្រកាសទំនាក់ទំនងស្នេហាជាផ្លូវការកាលពីដើមឆ្នាំ ២០១៧ កន្លងទៅ។ ក្នុងទំនាក់ទំនងស្នេហាដ៏ស្អិតល្មួតរយៈពេល ៨ ឆ្នាំមកនេះដែរ ពួកគេទទួលបានចំណងដៃកូនៗចំនួន ៥ នាក់ជាមួយគ្នា៕
