រឿងរ៉ាវរបស់បុរសម្នាក់នៅភាគឦសានប្រទេសចិន កំពុងតែផ្ទុះការចាប់អារម្មណ៍ខ្លាំងពាសពេញអ៊ីនធឺណែត ក្រោយរូបគេបានលួចឡានចំនួន ៨ គ្រឿង យកបើកបណ្ដាក់គ្នាមួយម្ដងៗទៅផ្ទះ ព្រោះតែមិនចង់ចាយលុយទិញសំបុត្រយន្តហោះដោយសារតែសំបុត្រថ្លៃពេក។
តាមការចេញផ្សាយពីសារព័ត៌មាន New Yellow River បានឱ្យដឹងថា បុរសរូបនោះមានឈ្មោះ Chen មកពីខេត្ត Liaoning ប្រទេសចិន បានធ្វើដំណើរតាមរថយន្តតែម្នាក់ឯងទៅខេត្ត Hunan។ កាលពីថ្ងៃទី ៣១ ខែឧសភា ឆ្នាំ ២០២៥ កន្លងទៅ លោកបានទិញសំបុត្រយន្តហោះត្រឡប់ទៅផ្ទះវិញចំនួន ១៥០០ យ័ន (ប្រមាណ ២០៩ ដុល្លារ) ប៉ុន្តែក៏លុបចោលការទិញវិញព្រោះតែគិតថាតម្លៃថ្លៃខ្លាំងពេក។
ក្នុងនាមជាអ្នកជំនាញលួចឡានស្រាប់ លោក Chen ក៏កើតគំនិតកេងចំណេញលុយដោយលួចឡានគេរហូត ៨ គ្រឿង ជិះបណ្ដាក់ម្ដងមួយៗត្រឡប់ទៅផ្ទះវិញ។ លោកបានលួចចូលហាងលក់រថយន្តនៅពេលយប់ យកសោពីកិទូរួចបើកឡានមួយចេញទៅ។ ចាប់ផ្ដើមបទល្មើសក្នុងដើមខែមិថុនានេះ លោក Chen បានធ្វើដំណើរទៅភាគខាងជើងឆ្លងកាត់ក្រុងចំនួន ៧ នៅចិន លួចឡានគេអស់ ៨ គ្រឿងនៅតាមផ្លូវ។ លោកផ្លាស់ប្ដូរឡានរាល់ពេលដែលឡានលួចគេមួយអស់សាំងក៏ទុកឡាននោះចោល ហើយទៅលួចឡានមួយជិះតទៀត។ ជាងនេះទៅទៀត ដើម្បីកេងលុយខ្លួនឯង លោកក៏បានលក់របស់មានតម្លៃក្នុងឡានដែលលួចនោះយកលុយទុកទិញម្ហូបអាហារ និង បង់ថ្លៃផ្លូវធ្វើដំណើរផងដែរ។
យ៉ាងណាមិញ មកដល់ថ្ងៃទី ០២ ខែមិថុនា ឆ្នាំ ២០២៥ បុគ្គលិកម្នាក់ក្នុងហាងលក់រថយន្តនៅក្រុង Wuhan បានរកឃើញថារថយន្តមួយគ្រឿងតម្លៃជាង ១៥ ម៉ឺនយ័ន (ជាង ២ ម៉ឺនដុល្លារ) រួមទាំងសោបានបាត់ ហើយក៏ប្រញាប់ទាក់ទងប្ដឹងប៉ូលិស។ ប៉ូលិសបានតាមដានរថយន្តដែលបាត់ ហើយក៏រកឃើញថារថយន្តនោះបានចេញពីក្រុង Wuhan ឆ្ពោះទៅភាគខាងជើង។ នៅថ្ងៃបន្ទាប់ក៏ឃើញនៅខេត្ត Hebei ដែលជាកន្លែង Chen ព្យាយាមលួចឡានគេមួយគ្រឿងទៀត ដោយបានធ្វើឱ្យម្ចាស់ឡានរងរបួសផងដែរ។
ទោះជាយ៉ាងណា សំណាញ់ច្បាប់ញឹក មកដល់ថ្ងៃទី ០៤ ខែមិថុនា ប៉ូលិសក៏ប្រទះឃើញ Chen ដេកក្នុងឡាននៅកន្លែងចតឡានមួយនៅខេត្ត Hebei និង ចាប់ខ្លួនបានសម្រេច។ រថយន្តដែល Chen លួចទាំងអស់ត្រូវបានរកឃើញវិញហើយ ខណៈ Chen ត្រូវចាប់ឃុំខ្លួនរង់ចាំការកាត់ក្ដី។ ក្រោមច្បាប់របស់ចិន អ្នកប្រព្រឹត្តបទល្មើសលួចរថយន្តកម្រិតធ្ងន់បែបនេះប្រឈមជាប់ពន្ធនាគាររហូតដល់ ១០ ឆ្នាំ៕
ប្រភព៖ Kenh14
