ថ្មីៗនេះ វីដេអូរបស់បុរសវ័យក្មេងម្នាក់ក្នុងប្រទេសឥណ្ឌា កំពុងផ្ទុះការចាប់អារម្មណ៍ ចែកចាយព្រោងព្រាតពាសពេញបណ្ដាញសង្គម ដោយអះអាងថា បុរសរូបនោះបានកើតការខឹងសម្បានឹងសង្សារ ទូរស័ព្ទខលលើកណាក៏រវល់ទាក់ទងមិនបាន រហូតផ្ទុះកំហឹងទៅឡើងបង្គោលភ្លើងរួចកាត់ផ្ដាច់ចរន្តឱ្យដាច់ភ្លើងប្រើប្រាស់ពេញមួយភូមិ។
តាមរយៈវីដេអូដែលថតបាន បង្ហាញឱ្យឃើញបុរសវ័យក្មេងខាងលើបានកាន់តន្ត្រៃយ៉ាងធំមួយ ឈរលើបង្គោលភ្លើង រួចធ្វើការកាត់ផ្ដាច់ខ្សែភ្លើងម្ដងមួយៗ ធ្វើឱ្យមនុស្សមួយភូមិត្រូវអត់អគ្គិសនីប្រើប្រាស់ ក៏ព្រោះតែរឿងអន់ចិត្តនឹងគូស្នេហ៍បែបនេះ។
យ៉ាងណាមិញ ភ្លាមៗក្រោយវីដេអូផ្ទុះផ្អើលចែកចាយខ្លាំង ក៏ស្រាប់តែមានមិត្តភក្តិរបស់បុរសក្នុងវីដេអូចេញមកបកស្រាយថា អ្វីដែលអះអាងខាងលើគឺជារឿងប្រឌិតឡើង ដោយបុរសរូបនោះមានឈ្មោះ Anwar តាមពិតគឺជាជាងភ្លើងក្នុងភូមិ Nikashi រដ្ឋ Assam ប្រទេសឥណ្ឌា ហើយវីដេអូនោះដែរ គឺថតអំឡុងពេលលោកធ្វើការកាត់ខ្សែភ្លើងចាស់ ដើម្បីដាក់ខ្សែភ្លើងថ្មីប៉ុណ្ណោះ មិនមែនខូចចិត្តនឹងសង្សារទៅកាត់ខ្សែភ្លើងចោលដូចការចោទប្រកាន់នោះឡើយ៕
