សារព័ត៌មាន India Today បានចេញផ្សាយករណីដ៏កម្រមួយដែលបានកើតឡើងនៅក្រុង Mahbubabad រដ្ឋ Telangana ប្រទេសឥណ្ឌា ដោយមានចោរមួយក្រុមលេងល្បិចទៅជួលឡានរ៉ូឡូកិនដីគេដោយបោកថាយកទៅធ្វើការងារពាក់ព័ន្ធនឹងផ្លូវ តែតាមពិតពួកគេលួចឡាននោះយកទៅលក់ឱ្យខាងអេតចាយសោះ។
តាមព័ត៌មានបានឱ្យដឹងថា ចោរថ្លើមធំមួយក្រុមនោះបានយករ៉ូឡូកិនដីដែលលួចបានទៅលក់ឱ្យខាងអ្នកទិញអេតចាយក្នុងតម្លៃ ២១៩ ០០០ រ៉ូពី (ប្រមាណ ២៥០៦ ដុល្លារ)។ តាមវីដេអូកាមេរ៉ាសុវត្ថិភាពបានបង្ហាញថា ឡានរ៉ូឡូកិនដីមួយគ្រឿងនោះបានបើកលើផ្លូវរួចបន្តបើកទៅក្រោមស្ពានអាកាស ដោយវីដេអូនោះថតជាប់ចោរច្បាស់ៗកំពុងតែបើកឡាន។
តាមពាក្យបណ្ដឹងពីម្ចាស់ឡានរ៉ូឡូ បានលើកឡើងថាលោកបានជួលរ៉ូឡូមួយគ្រឿងនោះទៅឱ្យមនុស្សមិនស្គាល់អត្តសញ្ញាណមួយក្រុមដែលគេនិយាយថាជួលទៅយកទៅធ្វើផ្លូវ។ រ៉ូឡូនោះត្រូវឃើញប្រទះលើកចុងក្រោយឃើញចតនៅក្រោមស្ពានអាកាសក្រុង Mahabubabad តែយ៉ាងណាពេលខាងម្ចាស់ឱ្យអ្នកបើកឡានគាត់ទៅពិនិត្យមើល ក៏ឃើញថាឡានរ៉ូឡូមួយនោះបានបាត់ទៅហើយ។
ការស៊ើបអង្កេតបឋមបានរកឃើញថា រ៉ូឡូដែលចោរលួចទៅនោះបានយកទៅលក់ឱ្យខាងអេតចាយ ដោយប៉ូលិសកំពុងបន្តស៊ើបអង្កេតបន្ថែមក្នុងការស្វែងរកក្រុមចោរទាំងនោះដើម្បីចាប់ខ្លួនយកមកកាត់ទោសតាមផ្លូវច្បាប់៕
