ថ្មីៗនេះ នារីជា Influencer ជនជាតិឥណ្ឌាម្នាក់ឈ្មោះ Mahi Singh កំពុងធ្វើឱ្យមហាជនជាច្រើនចាប់អារម្មណ៍ជាខ្លាំង ក្រោយរូបនាងទម្លាក់ QR Code ស្នើសុំអ្នកតាមដានខ្លួនបរិច្ចាគលុយម្នាក់ ១ រ៉ូពី ឬ ២ រ៉ូពី ក្ដី ដើម្បីឱ្យនាងអាចសម្រេចក្ដីស្រមៃរបស់នាងបាន។
តាមនាង Mahi ខ្លួនឯងផ្ទាល់បានរៀបរាប់ថា នាងចង់ទិញទូរស័ព្ទទំនើបថ្មី iPhone 17 Pro Max ដែលនៅឥណ្ឌាលក់ក្នុងតម្លៃ ១៤៩ ០០០ រ៉ូពី (ប្រមាណ ១៦៨០ ដុល្លារ)។
ដំបូងឡើយ នាងបានសុំឪពុកឱ្យទិញទូរស័ព្ទថ្មីនេះឱ្យដែរ ប៉ុន្តែត្រូវឪពុកនាងបដិសេធ ដោយសារគាត់ទើបឱ្យកាដូនាងជាទូរស័ព្ទ iPhone 16 កាលពី ៣ ខែមុនប៉ុណ្ណោះ។
រៀបរាប់ក្នុងវីដេអូ នាង Mahi បានសុំអ្នកគាំទ្ររបស់នាងថា៖ «ប្រសិនបើអ្នកទាំងអស់គ្នាម្នាក់បរិច្ចាគ ១ ឬ ៤ រ៉ូពី អ៊ីចឹងខ្ញុំគឺអាចទិញទូរស័ព្ទនេះបានហើយ ហើយខ្ញុំក៏អរគុណគ្រប់គ្នាដែរ ដែលធ្វើឱ្យក្តីស្រមៃខ្ញុំក្លាយជាការពិត»។
យ៉ាងណាមិញ ចុងបញ្ចប់ថាតើ Influencer រូបនេះ ទទួលបានលុយជំនួយគ្រប់ទិញទូរស័ព្ទថ្មីឬអត់នោះ មិនទាន់មានការបញ្ជាក់នៅឡើយទេ៕
