ថៃខ្វះកម្លាំងពលកម្មខ្លាំង ដល់ថ្នាក់ចង់យកទាហាន និង អ្នកទោសមកធ្វើការ បន្ទាប់ពីពលករកម្ពុជាសម្រុកវិលមកស្រុកវិញរាប់ម៉ឺននាក់

កាលពីថ្ងៃទី ១៨ ខែសីហា ឆ្នាំ ២០២៥ កន្លងទៅ សារព័ត៌មាន The Nation បានចេញផ្សាយថា ប្រទេសថៃមានគម្រោងចុះបញ្ជីកម្មករខុសច្បាប់ ប្រើប្រាស់ទាហាន និង អ្នកទោសក្នុងប្រទេសមួយចំនួន ដើម្បីយកមកជំនួសកម្លាំងពលកម្មដែលកំពុងខ្វះខាតខ្លាំង ក្រោយពលករកម្ពុជាជាង ៧ ម៉ឺននាក់នាំគ្នាត្រឡប់មកស្រុកកំណើតវិញ។

រដ្ឋមន្ត្រីក្រសួងការងារថៃ Pongkawin Jungrungruangkit បានចេញបញ្ជាបន្ទាន់ទៅកាន់ខាងនាយកដ្ឋានការងារ ឱ្យរិះរកវិធីដើម្បីបំពេញកម្លាំងពលកម្មក្នុងស្រុក ក្រោយការចាកចេញរបស់ពលករកម្ពុជា។ ជាការឆ្លើយតប លោក Somchai Morakotsriwan អគ្គនាយកនៃនាយកដ្ឋានការងារ ក៏បានលើកឡើងពីវិធានការចំនួន ៥ ចំណុចក្នុងការដោះស្រាយវិបត្តិខ្វះកម្លាំងពលកម្មនេះ។

វិធានការទាំង ៥ ចំណុចនោះរួមមាន៖ ១. ការយកទាហានចូលបម្រើកាតព្វកិច្ច អ្នកទោសថ្នាក់ទី ១ ដែលជិតដល់ថ្ងៃដោះលែង រួមទាំងយុវវ័យក្នុងមន្ទីរឃុំឃាំង ឱ្យទៅធ្វើការនៅខាងវិស័យផលិតកម្ម និង កសិកម្ម។ ២. ចុះបញ្ជីពលករចំណាកស្រុកដែលកំពុងបំពេញការងារខុសច្បាប់ក្នុងប្រទេសនាបច្ចុប្បន្ននេះ។ ៣. ពិចារណានាំយកពលករពីបណ្ដាប្រទេសផ្សេងដូចជា ស្រីលង្កា និង នេប៉ាល់ ជាដើម ដើម្បីកាត់បន្ថយការពឹងផ្អែកលើពលករមីយ៉ាន់ម៉ា ឡាវ និង កម្ពុជា។ ៤. ជ្រើសរើសពលករថែមពីជនភៀសខ្លួនមីយ៉ាន់ម៉ាប្រមាណ ៤ ម៉ឺននាក់ដែលកំពុងជ្រកកោនក្នុងប្រទេសថៃ។ ៥. ផ្សព្វផ្សាយការប្រើប្រាស់ប្រព័ន្ធស្វ័យប្រវត្តិកម្ម និង បច្ចេកវិទ្យាក្នុងវិស័យផលិតកម្ម ដើម្បីកាត់បន្ថយការពឹងផ្អែកលើកម្លាំងមនុស្ស៕