យុវវ័យចំនួន ២ រូប ដែលថតវីដេអូខ្លួនឯងឈរនោមដាក់ឆ្នាំង hotpot ក្នុងហាងល្បីមួយកន្លែង ឥលូវត្រូវបានតុលាការកាត់ក្ដីឱ្យចេញមុខជាមួយឪពុកម្ដាយមកសុំទោសគេ រួមនឹងបង់ថ្លៃសំណងការខូចខាតចំនួនជាង ៣០ ម៉ឺនដុល្លារ។
ហេតុការណ៍ខាងលើនេះដែរ បានកើតឡើងកាលពីខែកុម្ភៈ ឆ្នាំ ២០២៥ កន្លងទៅ នាហាងលក់ដ៏ល្បី Haidilao ដោយមានក្មេងប្រុសវ័យ ១៧ ឆ្នាំចំនួន ២ នាក់ បានថតវីដេអូខ្លួនឯងក្នុងស្ថានភាពស្រវឹងហើយឈរនោមដាក់ក្នុងឆ្នាំង hotpot ក្នុងហាងគេ រួចបង្ហោះលើបណ្ដាញសង្គម រហូតផ្ទុះការរិះគន់មិនពេញចិត្តខ្លាំង។
ក្នុងហេតុការណ៍នោះដែរ មិនមានការលើកឡើងថាមានអ្នកទទួលទានស៊ុបដែលក្មេងទាំងនោះនោមដាក់ឡើយ ប៉ុន្តែខាងហាង Haidilao ត្រូវចាយប្រាក់ខ្លួនឯងចេញថ្លៃអាហារជួសភ្ញៀវរាប់ពាន់នាក់ក្នុងហាងក្នុងរយៈពេលប៉ុន្មានថ្ងៃបន្ទាប់ពីករណីនោះបានកើតឡើង។ ជាក់ស្ដែង ក្នុងខែមីនាកន្លងទៅ ហាង Haidilao ត្រូវខាតបង់ប្រាក់ជាង ២៣ ម៉ឺនយ័ន ដោយគិតលើចំនួនដែលត្រូវសងភ្ញៀវជុំរិញរឿងរ៉ាវដែលបានកើតឡើងនោះ។
មកដល់ថ្ងៃទី ១២ ខែកញ្ញា ឆ្នាំ ២០២៥ កន្លងទៅ តុលាការក្រុងសៀងហៃក៏បានរកឃើញថា ក្មេងទាំងនោះបានរំលោភសិទ្ធិអចលទ្រព្យ ក៏ដូចជាកិត្តិយសរបស់ហាង តាមរយៈទង្វើប្រមាថ និង កត់សម្គាល់ឃើញថាទង្វើរបស់ពួកគេបានបំពុលអាហារលើតុ បង្កជាការប៉ះពាល់ខ្លាំងក្លាដល់សាធារណជន។
តុលាការរកឃើញទៀតថា ឪពុកម្ដាយក្មេងៗទាំងនោះក៏មិនបានបំពេញតួនាទីជាអាណាព្យាបាលល្អ ដូច្នេះខាងតុលាការក៏បានបញ្ជាឱ្យចេញមុខសុំទោស និង សងថ្លៃសំណងដូចបានរៀបរាប់ខាងលើនេះ៕
