តារាសម្ដែងហុងកុង Raymond Cho អាយុ ៦០ ឆ្នាំ ថ្មីៗនេះ បានបង្ហាញខ្លួនជាភ្ញៀវកិត្តិយសក្នុងកម្មវិធីសុខភាព «Med With Doc» របស់ទូរទស្សន៍ TVB ដោយក្នុងកម្មវិធីនោះ លោកបានចែករំលែកបទពិសោធដ៏ឈឺចាប់របស់ខ្លួនពេលរកឃើញកើតមានក្រួសក្នុងតំរងនោម។
តាមការទម្លាយ លោក Raymond បានកើតមានក្រួសក្នុងតំរងនោមលើកដំបូងកាលលោកនៅវ័យខ្ទង់ ២០ ឆ្នាំ ដោយពេលនោះលោកសង្ស័យថាវាកើតឡើងដោយសារតែលោកឧស្សាហ៍ទប់នោមពេក។ លោកបានរំឭកថា កាលពេលនោះ លោកធ្វើការវេនយប់ក្នុងផ្សារទំនើបមួយកន្លែង ដោយពេលធ្វើការលោកតែងឧស្សាហ៍ទប់នោមខ្លួនឯងរហូតវាកើតទៅជាទម្លាប់។
លោកបាននិយាយថា៖ «រាល់ពេលខ្ញុំតែងទប់នោមពី ២ ទៅ ៣ ម៉ោង ហើយទម្លាប់នេះបន្តដល់ប្រមាណជិត ១ ឆ្នាំ។ ដល់ពេលប៉ុន្មានខែបន្ទាប់មកទៀតនោះ ខ្ញុំក៏ចាប់ផ្ដើមមានអារម្មណ៍ថាឈឺ»។ ការឈឺចាប់នោះគឺខ្លាំងក្លាមែនទែនរហូតលោក Raymond ត្រូវសម្រាកព្យាបាល ៦ ថ្ងៃ។
គ្រូពេទ្យបានណែនាំឱ្យលោកផឹកទឹកឱ្យច្រើនជាងមុនដើម្បីឱ្យក្រួសធ្លាក់ចេញមកដោយឯកឯង។ ទោះករណីលោកមិនត្រូវការការវះកាត់ ប៉ុន្តែដោយការឈឺចាប់ខ្លាំងពេករហូតលោកត្រូវចាក់ថ្នាំ morphine រាល់ថ្ងៃដើម្បីបន្ថយការឈឺចាប់។
រហូតមកដល់ពេលប៉ុន្មានឆ្នាំកន្លងទៅនេះ តារាប្រុសខាងលើក៏កើតមានក្រួសក្នុងតំរងនោមម្ដងទៀត តែលើកនេះក្រួសបានធ្លាក់ដល់បង្ហួរនោម ធ្វើឱ្យលោកឈឺចាប់មួយបែបទៀត។ លោកពិបាកក្នុងការនោម ហើយបើនោមចេញក៏មានការឈឺចាប់ខ្លាំង និង ពេលខ្លះឃើញមានឈាមចេញមកតាមទឹកនោមទៀតផង។
ជួបជាមួយគ្រូពេទ្យលើកនេះ Raymond នៅតែមិនទទួលការវះកាត់ដដែល ដោយគ្រូពេទ្យនៅណែនាំឱ្យលោកផឹកទឹកឱ្យច្រើនដើម្បីរុញក្រួសឱ្យធ្លាក់ចេញមកខ្លួនឯង។
បើទោះជាលោក Raymond គិតថា ការកើតក្រួសក្នុងតំរងនោមគឺដោយសារតែលោកទប់នោម ប៉ុន្តែបើតាមការរៀបរាប់របស់គ្រូពេទ្យក្នុងកម្មវិធីបានបញ្ជាក់ថា វាមិនមានអ្វីទាក់ទងគ្នាឡើយរវាងទឹកនោមនៅប្លោកនោម និង ក្រួសក្នុងតំរងនោមនោះ។ យ៉ាងណាមិញ អាការកើតក្រួសនេះគឺទំនងកើតឡើងដោយសារតែការប្រឹងធ្វើការខ្លាំង បញ្ចេញញើសច្រើន និង មិនសូវផឹកទឹក។ ដូច្នេះ ការទុកឱ្យខ្លួនឯងបាត់បង់ជាតិទឹកនេះហើយ ដែលបង្កឱ្យមានហានិភ័យកើតក្រួសនោះ៕
ប្រភព៖ 8days
