ជាការពិតណាស់ មួយរយៈចុងក្រោយនេះសង្កេតឃើញថា តារាល្បីៗនៅហុងកុងជាច្រើនបានជួបប្រទះបញ្ហាលុយកាក់ខ្លាំងរហូតមួយចំនួនងាកទៅធ្វើជាអ្នករត់តាក់ស៊ី ឬរកការងារក្រៅម៉ោងមួយចំនួនផ្សេងទៀតដើម្បីរកប្រាក់មកផ្គត់ផ្គង់ក្រុមគ្រួសារ។
ឥលូវនេះ តារាជើងចាស់ TVB មួយរូបទៀតហើយគឺលោក Henry Lo ក៏បានចេញមកទួញសោកពីផលលំបាករបស់លោកក្នុងការរកប្រាក់ចិញ្ចឹមជីវិតបច្ចុប្បន្ននេះផងដែរ។ តារាសម្ដែងជើងចាស់ Henry Lo ដែលមានឈ្មោះល្បីល្បាញក្នុងនាមជាតួអង្គរងប្រចាំរឿងភាគល្បីៗរបស់ទូរទស្សន៍ TVB ថ្មីៗនេះ បានចេញមកទម្លាយពីបញ្ហាព្រួយបារម្ភរបស់លោកចំពោះប្រាក់ចំណូលដែលមិននឹងនរខ្លួន អំឡុងពេលជួបជាមួយនឹងនាយកប្រតិបត្តិរបស់ទូរទស្សន៍ TVB។
តារាប្រុសវ័យ ៦៧ ឆ្នាំរូបនេះបានរៀបរាប់ថា ការលុបចោលការថតជាញឹកញាប់ក្នុងរយៈពេលប៉ុន្មានឆ្នាំថ្មីៗនេះបានធ្វើឱ្យលោកបាត់បង់ចំណូលជាខ្លាំង។ លោកបានលើកយករឿងមួយមកនិយាយពេលដែលលោកត្រូវបានគេកក់ឱ្យថតរឿងភាគមួយ តែក្រោយមកតំណែងរបស់លោកក៏បានគេកាត់ចេញវិញដោយសារតែស្គ្រីបត្រូវផ្លាស់ប្ដូរ បណ្ដាលឱ្យលោកត្រូវអត់មានការងារធ្វើ។
ក្នុងកិច្ចសម្ភាសមួយជាមួយ HK01 លោក Henry Lo បាននិយាយថា៖ «ខ្ញុំសង្ឃឹមថាខ្ញុំទទួលបានការ treat ដែលយុត្តិធម៌ និង ត្រឹមត្រូវមួយ។ ខ្ញុំយល់ថារាល់ក្រុមហ៊ុនទាំងអស់កំពុងជួបប្រទះការលំបាក តែខ្ញុំក៏ត្រូវការលុយបង់ថ្លៃជួល និង ត្រូវការរស់នៅជីវិតដ៏សាមញ្ញមួយផងដែរ។ អ្នកលាងចានពេញម៉ោងអាចនឹងរកចំណូលបានជាងខ្ញុំផង»។
ជាមួយគ្នានោះដែរ លោក Henry ក៏បានទទូចឱ្យខាង TVB គោរពស្ញប់ស្ញែងដល់តារាជើងចាស់ដែលសម្ដែងជាតួអង្គរងពីមុនៗផង។ លោកបានបន្ថែមថា៖ «ពេលដែលពួកគេចេញទៅ ពួកគេទៅបាត់ហើយ។ ប្រសិនបើអ្នកមិនឱ្យតម្លៃពួកគេនោះទេ នោះនឹងលែងមានតទៅទៀតហើយ។ ពេលខ្លះ តារាសម្ដែងក្មេងៗយកមកឱ្យសម្ដែងជាតួអង្គមនុស្សចាស់ អ៊ីចឹងហេតុអីមិនទៅហៅតារាចាស់ៗមកសម្ដែងវិញមក?»។
បើទោះជាមានពាក្យទួញសោកមួយចំនួនក៏ពិតមែន ប៉ុន្តែលោក Henry គឺមិនមានគម្រោងចាកចេញពីទូរទស្សន៍ TVB នោះឡើយ ដោយបច្ចុប្បន្នលោកកំពុងចរចាបន្តកុងត្រាថ្មី៕
ប្រភព៖ 8days
