ជាការពិតណាស់ ខណៈសិស្សនិស្សិតភាគច្រើននៅជប៉ុនពឹងផ្អែកលើរថយន្តក្រុង ឬរទេះភ្លើងដើម្បីជាមធ្យោបាយធ្វើដំណើរទៅសាលារៀន តែចំពោះតារាចម្រៀងស្រីរូបស្រស់ Yuzuki Nakashima វិញ នាងបែរជាចំណាយពេល ៤ ម៉ោងរាល់ថ្ងៃក្នុងរយៈពេល ៤ ឆ្នាំពេញ ទិញសំបុត្រជិះយន្តហោះទៅសាលារៀន។
គួរឱ្យដឹងថា តារាចម្រៀងស្រីវ័យ ២២ ឆ្នាំខាងលើបានបញ្ចប់ការសិក្សាហើយនៅមហាវិទ្យាល័យ Kitakyushu City University កាលពីខែមីនា ឆ្នាំ ២០២៥ កន្លងទៅ ដោយទើបតែថ្មីៗនេះ រូបនាងបានបង្ហាញវីដេអូ vlog លើ Youtube រៀបរាប់ពីជីវិតប្រចាំថ្ងៃរបស់នាង។ ជាអ្នករស់នៅក្រុងតូក្យូ Yuzuki ដែលជាសមាជិកក្រុមចម្រៀង J-pop ឈ្មោះ Sakurazaka46 ត្រូវចំណាយពេល ៤ ម៉ោងរាល់ថ្ងៃទៅក្រុង Fukuoko (ទាំងទៅទាំងមក) ដែលមានចម្ងាយប្រមាណ ១ ពាន់គីឡូម៉ែត្រពីគ្នា។
ក្នុង vlog របស់នាងដែរ នាងបានបង្ហាញឱ្យឃើញថាពេលព្រឹកឡើងនាងភ្ញាក់ពីគេងនៅម៉ោង ៥ ដើម្បីរៀបចំផាត់មុខផាត់មាត់មុនពេលនាងចាកចេញទៅព្រលានយន្តហោះ Haneda នៅម៉ោង ៦។ នាងឡើងយន្តហោះឆ្ពោះទៅកាន់ព្រលានយន្តហោះ Kitakyushu ដោយចុះចតដល់ទីនោះនៅម៉ោងប្រមាណ ៩ និង ៣០ នាទី។ យ៉ាងណាមិញ ដំណើរឆ្ពោះទៅកាន់សាលារៀនរបស់នាងមិនបញ្ចប់ត្រឹមហ្នឹងទេ ដោយនាងនៅត្រូវបន្តជិះរថយន្តក្រុង ឬតាក់ស៊ីដើម្បីទៅដល់បរិវេណសាលា។ រាល់ការធ្វើដំណើរទៅសាលារៀននេះ នាងត្រូវចំណាយប្រាក់ប្រមាណ ១៥០០០ យេន (ប្រមាណជាង ១០០ ដុល្លារ)។
ក្រោយវីដេអូរបស់នាងបានបង្ហោះចេញទៅ មហាជនជាច្រើនបានសម្ដែងការភ្ញាក់ផ្អើលចំពោះការដាក់ចិត្តកាយប្រឹងប្រែងលើការរៀនសូត្ររបស់នាង ដោយមានមហាជនម្នាក់ថែមទាំងហៅនាងថា «superwoman» ទៀតផង ព្រោះកោតសរសើរនាងខ្លាំងចំពោះការរៀបចំពេលវេលាបានល្អទាំងលើការសិក្សា និង ភាពមមាញឹកក្នុងនាមជាតារាចម្រៀងល្បីម្នាក់។
Yuzuki បានបកស្រាយបន្ថែមដែរថា នាងមិនចង់ឱ្យជីវិតជាសិស្សរបស់នាងប៉ះពាល់ដល់ការសម្ដែងរបស់ក្រុម Sakurazaka46 នោះទេ ដោយនាងបានទុកការរៀនសូត្រនេះជាអាថ៌កំបាំងរហូតទាល់រៀនចប់ទើបនាងបង្ហាញបែបនេះ។ ចុងបញ្ចប់ Yuzuki ក៏បានទម្លាយពាក្យពេចន៍ដ៏មានន័យចំពោះអ្នកតាមដាននាងដែរថា៖ «ប្រសិនបើអ្នកទាំងអស់គ្នាមានក្ដីស្រមៃ ទោះជាវាមានការលំបាកយ៉ាងណា អ្នកត្រូវតែក្លាហានដេញតាមក្ដីស្រមៃនោះ។ រាល់វិនាទីដែលអ្នកចំណាយក្នុងការដេញតាមក្ដីស្រមៃរបស់អ្នក វានឹងក្លាយជាការចងចាំដ៏មានតម្លៃបំផុតមួយសម្រាប់ជីវិតអ្នក»៕
ប្រភព៖ 8days
