ជាដំណឹងដ៏តក់ស្លុតបំផុតមួយសម្រាប់អ្នកគាំទ្ររឿងភាគហុងកុង ជាពិសេសរឿងរបស់ទូរទស្សន៍ TVB ដោយលោកតា Benz Hui Shiu-hung បានទទួលមរណ-ភាពហើយក្នុងវ័យ ៧៦ ឆ្នាំ ក្រោយកើតជំងឺមហារីកធ្វើឱ្យគ្រឿងក្នុងលោកតាលែងដំណើរការ នេះបើតាមការបញ្ជាក់ពីក្រុមគ្រួសារលោកតានៅព្រឹកថ្ងៃទី ២៨ ខែតុលា ឆ្នាំ ២០២៥ នេះ។
លោកតា Benz Hui បានលាចាកលោកនៅវេលាម៉ោង ២ និង ៣០ នាទីយប់ ឈានចូលថ្ងៃទី ២៨ ខែតុលា នេះ (ពេលវេលាក្នុងតំបន់) ដោយមានក្រុមគ្រួសារ និង មិត្តជិតស្និទ្ធនៅក្បែរខ្លួន។ ដំណឹងមរណភាពរបស់លោកតា បានប្រកាសត្រឹមមួយថ្ងៃ ក្រោយសារព័ត៌មានជាច្រើនចេញផ្សាយថា លោកតាធ្លាក់ខ្លួនឈឺធ្ងន់ រហូតតារាល្បីៗរបស់ TVB ជាច្រើន រួមមាន តារាសម្ដែង Bosco Wong, Michael Miu, Bobby Au-yeung, Charmaine Sheh, Raymond Lam និង Ron Ng ជាដើម ប្រញាប់ប្រញាល់ទៅមន្ទីរពេទ្យសួរសុខទុក្ខលោកតាភ្លាមៗ។
ចំពោះ ពិធីបុណ្យសពរបស់លោកតា Benz Hui ខាងក្រុមគ្រួសារកំពុងរៀបចំ ដោយព័ត៌មានលម្អិត ក្រុមគ្រួសារនឹងប្រកាសតាមក្រោយទៀត៕
