កាលពីរសៀលថ្ងៃទី ០៣ ខែធ្នូ ឆ្នាំ ២០២៥ កន្លងទៅ ប៉ូលិសខេត្ត Lang Son ប្រទេសវៀតណាម បានចេញការប្រកាសមួយថា កាលពីថ្ងៃទី ២៩ ខែវិច្ឆិកា ឆ្នាំ ២០២៥ កន្លងទៅ ភ្នាក់ងារប៉ូលិសស៊ើបអង្កេតបានចាប់ខ្លួនបុរសវ័យ ៥៧ ឆ្នាំម្នាក់ឈ្មោះ Doan Van Sang អតីតអនុប្រធានក្រុមគ្រប់គ្រងផ្សារលេខ ៤ នៃនាយកដ្ឋានគ្រប់គ្រងផ្សារ ពីបទល្មើសឃាតកម្មក្រោមមាត្រា ១២៣ នៃក្រមព្រហ្មទណ្ឌ។
តាមការស៊ើបអង្កេតដំបូង លោក Doan Van Sang បានស្គាល់ជនរងគ្រោះជាបុរសវ័យ ៣៦ ឆ្នាំ ឈ្មោះ Nguyen Xuan Dat តាំងពីឆ្នាំ ២០២០ មកម្ល៉េះ។ ពួកគេទាំងពីរត្រូវបានឱ្យដឹងថា បានទំនាក់ទំនងគ្នាតាមគ្រុបអនឡាញ និង តែងចែករំលែកជជែកជាមួយគ្នាពីមាតិកាមិនសមរម្យជាច្រើន។ មកដល់ថ្ងៃទី ២៥ ខែមករា ឆ្នាំ ២០២៥ មុនចូលឆ្នាំចិនមួយថ្ងៃ លោក Sang ក៏បានហៅជនរងគ្រោះទៅទីស្នាក់ការកណ្ដាលក្រុមគ្រប់គ្រងផ្សារលេខ ៤ នៅសហគមន៍ Huu Lung រួចក៏សម្លាប់ជនរងគ្រោះនៅទីនោះតែម្ដង។
ក្រោយមក លោក Sang បានលុបបំផ្លាញ់ដានទាំងអស់ រួមទាំងបំផ្លាញសាកសពដើម្បីបិទបាំងឧក្រិដ្ឋកម្មរបស់ខ្លួន។ នៅប៉ុន្មានថ្ងៃបន្ទាប់ លោកក៏បន្តទៅធ្វើការតាមធម្មតា លេងហ្វេសប៊ុក និង ឆាតក្នុងគ្រុបធម្មតាដូចគ្មានរឿងអ្វីកើតឡើង។ ស្រាប់តែមកដល់ដើមខែកក្កដា មានការបែកធ្លាយវីដេអូមួយបង្ហាញពីសកម្មភាពព្រៃផ្សៃរបស់លោក Sang បង្ហោះលើបណ្ដាញសង្គម តែក្រោយមកក៏ត្រូវបានលុបចេញវិញភ្លាមៗ។
ដល់ពាក់កណ្ដាលខែវិច្ឆិកា ក៏លេចចេញឯកសារ ៨៨ ទំព័រ រៀបរាប់លម្អិតពីហេតុការណ៍ដែលបានកើតឡើង និង ចង្អុលបង្ហាញច្បាស់ៗថាលោក Sang ជាជនសង្ស័យសំខាន់។ ឯកសារត្រូវបានចែកចាយខ្លាំងរហូតធ្វើឱ្យករណីនេះឡើងក្ដៅគគុកវិញជាថ្មី។ រហូតមកដល់ថ្ងៃទី ២៨ ខែវិច្ឆិកា នាយកដ្ឋានប៉ូលិសផ្នែកឧក្រិដ្ឋកម្មប្រចាំខេត្ត Lang Son ក៏បានធ្វើការចុះឆែកឆេរផ្ទះរបស់លោក Sang រួចក៏រឹបអូសវត្ថុតាងមួយចំនួន។ នៅថ្ងៃបន្ទាប់ ប៉ូលិសក៏បានទៅរុករកទីស្នាក់ការចាស់នៃក្រុមគ្រប់គ្រងផ្សារលេខ ៤ ដោយប្រើប្រាស់ឡានបូមលូដើម្បីរុករកភស្តុតាង។ តាមអ្នកជិតខាងនៅទីតាំងកើតហេតុម្នាក់បាននិយាយថា គាត់នៅទីនោះធម្មតាគ្មានអ្វីគួរឱ្យសង្ស័យនោះឡើយ ប៉ុន្តែទើបតែនៅដើមឆ្នាំ ២០២៥ មានប៉ុន្មានផ្ទះជាប់ៗគ្នាជិតទីស្នាក់ការចាស់នោះ បាននាំគ្នាធុំក្លិនស្អុយ ហើយក៏ឃើញមានរុយកើតឡើងច្រើនដោយគ្មានមូលហេតុ។
ជុំវិញករណីនេះផងដែរ ប៉ូលិសបានណែនាំឱ្យគ្រប់គ្នាឈប់បន្តចែកចាយ ខមមិន ឬចែករំលែកវីដេអូ និង រូបភាពអវិជ្ជមានដែលញុះញង់ឱ្យមានអំពើហិង្សាទាក់ទងនឹងករណីនេះ។ រាល់សកម្មភាពនៃការចែករំលែក ការបង្ហោះ ឬការផ្សព្វផ្សាយរូបភាព និង វីដេអូខាងលើដោយខុសច្បាប់ នឹងត្រូវចាត់វិធានការតឹងរឹងទៅតាមច្បាប់៕
ប្រភព៖ VN Express
