នៅភូមិដាច់ស្រយាលមួយនាសង្កាត់ Pathanamthitta រដ្ឋ Kerala ប្រទេសឥណ្ឌា កើតមានជម្លោះប្ដឹងផ្ដល់មួយរវាងអ្នកជិតខាងគ្នា ដោយជម្លោះនោះមិនមែនពាក់ព័ន្ធនឹងលុយកាក់ ឬដីធ្លីអ្វីនោះទេ ប៉ុន្តែគឺពាក់ព័ន្ធនឹងសត្វមាន់ចិញ្ចឹមដែលរងាវរាល់ព្រឹកព្រលឹមប៉ះពាល់ដំណេកដេកពួនមិនស្កប់ស្កល់។
ម្ចាស់បណ្ដឹងមានឈ្មោះថា Radhakrishna Kurup បានទម្លាយឱ្យដឹងថា ដំណេករបស់លោកត្រូវបានរំខានរៀងរាល់ថ្ងៃនៅម៉ោង ៣ ភ្លឺ ដោយសារតែមាន់របស់អ្នកជិតខាងរងាវ ធ្វើឱ្យលោកមានការពិបាកដេកមិនដែលបានពេញភ្នែកស្កប់ស្កល់នោះឡើយ។
ដោយទ្រាំនឹងការរំខានដដែលៗនេះលែងបាន លោក Kurup ក៏បានសម្រេចចិត្តចាត់វិធានការដោយដាក់ពាក្យប្ដឹងទៅខាងអាជ្ញាធរឱ្យជួយមកអន្តរាគមន៍លើបញ្ហានេះ។ ក្រោយទទួលពាក្យបណ្ដឹង ខាងអាជ្ញាធរក៏មិនទុកចោលបានចុះស៊ើបអង្កេតភ្លាមៗ ស្វែងរកប្រភពទីតាំងនៃមាន់រងាវដោយដឹងថាចេញពីផ្ទះអ្នកជិតខាងម្នាក់ឈ្មោះ Anil Kumar។
ក្រោយរកប្រភពបញ្ហាឃើញហើយនោះ ខាងអាជ្ញាធរក៏បានកោះហៅទាំងលោក Kurup និង អ្នកជិតខាង Kumar មកជជែកដោះស្រាយគ្នា។ តាមអាជ្ញាធរបានឱ្យដឹងថា មាន់របស់លោក Kumar ចិញ្ចឹមទុកនៅជាន់លើបង្អស់នៃផ្ទះរបស់លោក ដោយពេលវាងើបរងាវម្ដងៗពិតជារំខានដល់អ្នកជិតខាងពិតមែន។
ដោយពិនិត្យមើលលើស្ថានការណ៍ជាក់លាក់ហើយនោះ ខាងអាជ្ញាធរក៏បានប្រាប់ឱ្យលោក Kumar ប្ដូរកន្លែងចិញ្ចឹមមាន់ទៅទីតាំងថ្មីដើម្បីកាត់បន្ថយសំឡេងរំខានដល់អ្នកជិតខាង។ ជម្លោះក៏បានបញ្ចប់ ដោយអាជ្ញាធរទុកពេល ១៤ ថ្ងៃឱ្យលោក Kumar ក្នុងការផ្លាស់ប្ដូរទីតាំងចិញ្ចឹមមាន់របស់លោក៕
