សារព័ត៌មាន 9GAG បានចេញផ្សាយករណីដ៏គួរឱ្យហួសចិត្ត និង មិនធ្លាប់មានមួយ ដោយបុគ្គលិកបម្រើការលើយន្តហោះ British Airways ម្នាក់ ត្រូវបានប្រទះឃើញទាំងខ្លួនននលគករាំលេងសប្បាយក្នុងបន្ទប់ទឹក business-class។
តាមសារព័ត៌មាន The Sun បុរសជាបុគ្គលិកបម្រើការយន្តហោះខាងលើមានវ័យ ៤១ ឆ្នាំ ដោយអំឡុងពេលផ្ដល់សេវាកម្មអាហារជូនភ្ញៀវដែលហោះចេញពីព្រលានអន្តរជាតិ San Francisco ទៅព្រលាន Heathrow នៅឡុងដុង បុគ្គលិកដទៃផ្សេងទៀតគឺមិនបានឃើញវត្តមានរបស់លោកឡើយ។ គ្រប់គ្នាបានតាមស្វែងរកលោក ដោយចុងក្រោយក៏ប្រទះឃើញកំពុងតែរាំលេងសប្បាយទាំងខ្លួនននលគកក្នុងបន្ទប់ទឹក។ ឃើញបែបនោះ ខាងក្រុមការងារក៏បានយកឈុតគេងយប់ស្លៀកពាក់ឱ្យបុរសរូបនោះ និង ចាប់ឃាត់រូបគេឱ្យអង្គុយនៅកៅអីមួយកន្លែងពេញមួយការហោះហើររយៈពេល ១០ ម៉ោងកន្លះនោះ។
បើតាមព័ត៌មាន The Independent ប៉ូលិសបានដាក់ការសង្ស័យថា បុរសជាបុគ្គលិកបម្រើការលើយន្តហោះនោះអាចនឹងប្រើប្រាស់គ្រឿងញៀនមុនពេលហេតុការណ៍ដ៏ភ្ញាក់ផ្អើលនោះបានកើតឡើង។ ប៉ូលិសបានរៀបរាប់ថា៖ «កងកម្លាំងបានចាប់ឃាត់ខ្លួនបុរសនោះក្រោយរូបគេទទួលបានការព្យាបាល។ គេត្រូវបានចាប់ខ្លួនពីបទសង្ស័យប្រព្រឹត្តទង្វើមិនសមរម្យអំឡុងពេលបំពេញកាតព្វកិច្ចការងារ តែក្រោយមកក្រោមការស៊ើបអង្កេតរួចរាល់ រូបគេក៏ត្រូវបានដោះលែងវិញ»៕
