កាលពីថ្ងៃទី ២៩ ខែវិច្ឆិកា ឆ្នាំ ២០២៤ កន្លងទៅ មានហេតុការណ៍ដ៏ចលាចលមួយបានកើតមានឡើងក្នុងយន្តហោះមួយគ្រឿងរបស់ក្រុមហ៊ុន Delta ដែលត្រូវហោះចេញពី Atlanta ទៅ Barcelona។ យ៉ាងណាមិញ យន្តហោះមួយគ្រឿងនោះត្រូវបង្ខំបកក្បាលត្រឡប់ក្រោយវិញ ព្រោះតែមានអ្នកដំណើរម្នាក់មានបញ្ហារាកខ្លាំងរហូតលាមកហៀរហូរប្រឡាក់ពាសពេញកាប៊ីនយន្តហោះ។
ជាក់ស្ដែង តាមរយៈវីដេអូដែលថតបានបង្ហាញឱ្យឃើញចន្លោះផ្លូវដើរក្នុងកាប៊ីនយន្តហោះគឺពោរពេញដោយលាមក និង ក្រដាសអនាម័យ។ ដោយឡែក ចំពោះអ្នកដំណើររាប់រយនាក់ផ្សេងទៀតវិញ គឺស្លុតនឹងអ្វីដែលបានកើតឡើងនោះខ្លាំងមែនទែន។
ភ្លាមៗ ក្រោយយន្តហោះចុះចតដោយសុវត្ថិភាព ខាងរថយន្តសង្គ្រោះក៏បាននាំយកអ្នកដំណើរដែលមានបញ្ហាសុខភាពនោះចេញពីយន្តហោះទៅព្យាបាល។ ចំពោះអ្នកដំណើរទាំង ៣៣៦ នាក់ផ្សេងទៀតត្រូវពន្យារកាហោះហើររាប់ម៉ោងដោយសារតែហេតុការណ៍មួយនេះ។ទោះជាយ៉ាងណា ខាងបុគ្គលិកសម្អាតរបស់យន្តហោះក៏បានប្រញាប់ប្រញាល់សម្អាត និង ផ្លាស់ប្ដូរកម្រាលយន្តហោះចេញ ដោយប្រើពេលប្រមាណ ៥ ម៉ោងទើបសម្អាតរួចរាល់។
យន្តហោះក៏បន្តដំណើរធម្មតា និង បានទៅដល់ក្រុង Barcelona ដោយយឺតជាងពេលវេលាកំណត់ ៨ ម៉ោង៕
