ដល់-ក! យន្តហោះមួយគ្រឿងត្រូវពន្យារពេលហោះ ២ ម៉ោង ព្រោះអូតែសត្រូវភ្ញៀវខាំដៃ

ថ្មីៗនេះ មានហេតុការណ៍ឈ្លោះទាស់ទែងសឹងស៊ីសាច់ហុតឈាមគ្នារវាងអ្នកដំណើរស្រី ២ នាក់លើយន្តហោះរបស់ក្រុមហ៊ុន Shenzhen Airlines រហូតដល់ថ្នាក់អ្នកដំណើរម្នាក់ខាំដៃអូតែសលើយន្តហោះរហូតរងរបួស។

តាមព័ត៌មានបានឱ្យដឹងថា ហេតុការណ៍មួយនេះដែរបានកើតមានឡើងស្របពេលយន្តហោះរៀបនឹងហោះហើរទៅហើយ ដោយមានអ្នកដំណើរស្រី ២ នាក់អង្គុយលើកៅអីជួរជាមួយគ្នាក៏កើតមានជម្លោះទាស់ទែងគ្នា។ ដើមហេតុបង្កឱ្យមានជម្លោះនោះត្រូវបានឱ្យដឹងថាដោយសារតែស្ត្រីជាអ្នកដំណើរម្នាក់មានអារម្មណ៍មិនស្រណុកជាមួយនឹងក្លិនខ្លួន និង ទឹកអប់ដែលស្ត្រីអង្គុយក្បែរគ្នាបាន។

ជម្លោះពាក្យសម្ដីឈានដល់ការប្រតាយប្រតប់គ្នារហូតខាងអូតែសលើយន្តហោះ រួមទាំងអ្នកដំណើរផ្សេងទៀតចូលមកជួយឃាត់ដើម្បីឱ្យជម្លោះនោះបញ្ចប់ទៅវិញ។ បុរសជាអ្នកដំណើរ ២ នាក់អង្គុយនៅជួរខាងក្រោយបានព្យាយាមជួយអូតែសស្រីដែលចូលទៅជួយគាត់អ្នកដំណើរខ្លួនកុំឱ្យវាយតប់គ្នា។ យ៉ាងណាមិញ ខណៈកំពុងចូលទៅជួយឃាត់នោះ អូតែសម្នាក់ក៏ត្រូវបានស្ត្រីជាអ្នកដំណើរម្នាក់ខាំដៃ និង អ្នកដំណើរម្នាក់ផ្សេងទៀតរបួសដោយការខ្វាច។

ប៉ូលិសបានមកដល់ភ្លាមៗ និង បាននាំអ្នកដំណើរទាំងពីរបង្កភាពចលាចលលើយន្តហោះនោះចេញ។ ហេតុការណ៍នេះដែរ បានបណ្ដាលឱ្យយន្តហោះត្រូវពន្យារពេលហោះរហូតដល់ ២ ម៉ោង ដោយពេលវេលាកំណត់ដំបូង យន្តហោះត្រូវហៅចេញពីព្រលានអន្តរជាតិ Shenzhen Bao’an ទៅព្រលានយន្តហោះអន្តរជាតិ Shanghai Hongqiao នៅម៉ោង ៥ និង ៤៥ នាទីល្ងាច ប៉ុន្តែត្រូវពន្យារពេលដល់ម៉ោង ៧ និង ៥៦ នាទីយប់ទើបបានហោះចេញ៕